Nongpoh, Iaiong 14 : Kawei ka Iing kala shah bamduh ha ki thylliej ding ha ka jingjia pluh iing kaba jia hynnin ka miet ha ka shnong Sohnidan, kaba hap hapoh ka Umsning C&RD Block, Ri-Bhoi District.
Kane ka Iing ka dei jong ka kong Itailis Khymdeit bad u Bah Tiwen Warjri, kiba don 5 ngut ki Khun. La iathuh ba kane ka jingjia kala jia ha ka por 7 baje eiei mynmiet.
Ka ding kaba klang bad bar hem bha, kala bam iingkhong khait ia baroh kawei ka Iing lem bad ki jingdon jingem jong kane ka Longiing.
Ki Pulit ki pyntip ba kane ka jingjia kala jia ha ka por ba kine ki shi-iing shisem ki dang leit kai sha ka Iing ka Kmieieid ki Khun. La suba jur ba kane ka jingpur ding ka lah ban dei na ka kamra shet jingshet, kaba la shu ieh ia ka ding hadien ba dep shet jingshet shuwa ban mih leitkai.
La pyntip ba ka ding kala bamduh haduh 5 quintal u synsar, 5 mon u khaw, ki jain ki nep bad ki kot skul jong ki khun nalor kiwei kiwei ki mar ba donkam.
Halor kane ka jingjia, ka Shnong Sohnidan kala pynpaw ia ka jingsngewsih ba katei ka longiing kala mad ia kane ka apot ban duh ia ka iing ka sem.
U Bah Wander Khymdeit, Rangbah Shnong ka Sohnidan, u iathuh ba ka Shnong kala pyntip mar mar ia kane ka jingjia sha ka Ophis jong ka Umsning C&RD Block ban thaw ia ki lad jingiarap ia kane ka longiing. U iathuh ba ka shnong ruh kala pyrshang ban thaw lad thaw lynti kumno ban iarap shipor ia kane ka Longiing.
Une u Rangbah Shnong ula buh ruh ka jingkyrpad ia ki bor Sorkar, ki nongmihkhmat bad ki kynhun bapher bapher ba kin noh lem ia ki jingiarap sha kane ka Longiing.
