Shillong, Naiwieng 08: Kawei ka ïing ka ba don hapoh ka Dong Kamon Nongmensong kala kem ding kynsan haka por 2 baje mynstep jong ka 8 tarik mynta u bnai bad ha kane ka jingjia 2 ngut ki briew kila mynsaw kynthup uwei u ba la mynsaw jur.
Haba iakren bad ki katto katne ngut ki nong shong shnong, la iathuh ba kane ka jingjia pluh ïing ka la jur bha bad mar sien iohi iaka ding, ki para marjan kila pyntip mar mar sha ki pulit kiba la wan ryngkat bad ki kali pynlip ding.
La iathuh ba watla ki pulit pynlip ding kila poi kloi sha kane ka jaka hynrei namar ka jingbym shim khia ka tnat MeECL, ki pulit pynlip ding bad ki paidbah ruh kumjuh kim shym la lah ban tem iaka ding kaba la bam duh iaka ïing.
Ki lanot bad kumjuh ruh ki para marjan kila pynpaw ka jingbitar iaka tnat MeECL ka ba la khien sting ban pynlip iaka bording haka por ba biang naka bynta ban ailad iaki pulit pynlip ding bad iaki paidbah ban tem iaka ding.
“Haka por ba dang bam duh ka ding ia kane ka ïng la ima shisha ka jingpar ka bording bad dei namar kane, ki para marjan bad kumjuh ruh ki pulit pynlip ding kim lah satia ban leh eiei ha ka ban tem iaka ding bad kane ka pynlong ruh iaka longïng ban duh lut iaki jingdon jingem” la ong kawei ka longkmie ba sah marjan.
La iathuh ba uwei na ki ba mynsaw jur u dang don kumba 18 snem bad haduh mynta u dang shah sumar ha hospital bad iwei ki longkmie ila mynsaw malu mala.
Haba iadei bad kane ka jingjia, naka liang ki pulit ki dang pynlong ka jingtohkit ban lap iaki daw tynrai ba pluh kane ka ïng.
