Jorhat, Rymphang 17: Haduh kumba 100 tylli ki dukan ki la ingkhong na ka jingpluh ding ba shyrkhei ha ka jaka iew Chowk Bazar hapoh Jorhat district ka Assam ha kane ka jan miet sngi Palei ba la lah.
Katkum ki trai shnong la ong ba ka daw jong kane ka jingpluh ding ka la sdang na kawei ka dukan jain kaba don hajan ka khyrdop jong ka iew hadien ka jingthut ha ka bording ilektrik.
Haduh kumba 25 tylli ki kali pynlip ding ki la wan poi ha kan ka jaka ban tem ia kane ka ding kaba klang.
“Ia mynta hi ngim pat lah ban batai ha kaba iadei bad ki jingjulor, hynrei palat 100 tylli ki dukan ki la shah pynjulor ha kane ka jaka iew.Ki kali pynlip ding ki la wan poi mardor ha kane ka jaka.Mynta la lah ban tehlakam ia ka jinglong jingman.Ngi suba jur ba kane ka jingpluh ding ka dei na ka jingthut ha ka bording ilektrik,” ong u SP ka Jorhat u Mohan Lal Meena.
“Ha kaba khatduh hadien ka jingiakhun kaba la neh bun bun kynta la lah ban tem ia ka ding kaba klang,” ong shuh shuh une u heh pulit.
