Shillong, Rymphang 26 : Ka tnad District Council Affairs (DCA) ka Jylla kala pynbna ba ka dorbar ban jied ia u Chief Executive Member (CEM) bad Chairman ba thymmai ka Khasi Hills Autonomous District Council (KHADC) bad Jaintia Hills Autonomous District Council (JHADC), kan long ha ka 28 tarik Rymphang.
Shisngi shuwa kane, kata ha ka 27 tarik Rymphang, yn pynlong ia ka dorbar ban pyntian smai ia ki MDC ba dang shu shah jied thymmai jong ki Iingdorbar kine ki artylli ki District Council.
Ia kane la pyntip da u Commissioner & Secretary ka Tnad DCA Bah Cyril Diengdoh uba iathuh ba ka jingpyntian smai ia ki MDC kan long ha ka por 11 baje mynstep.
Ha ka sngi kaba bud, yn pynlong ia ka elekshon ban jied ia u Chairman ka Iingdorbar, ka ban long ha ka por 11 baje mynstep bad hadien yn pynbud da ka elekshon ban jied ia u Chief Executive Member (CEM), ka ban sdang ha ka por 2 baje nohphai sngi.
U Lat ka Jylla ula thung ia ka Deputy Commissioner ka East Khasi Hills bad West Jaintia Hills ban pyniaid ia kine ki dorbar jong ka Council bad ban pynbam smai ia ki MDC ba thymmai kat kum ka rule 24 jong ka Assam & Meghalaya Autonomous District (Constitution of District Council ) Rules 1951.
La pyntip ba tang ia ka dorbar ban jied ia u Chief Executive Member (CEM) yn pyniaid da u Chairman ba thymmai ka Council.
 ka Jylla kala pynbna ba ka dorbar ban jied ia u Chief Executive Member (CEM) bad Chairman ba thymmai ka Khasi Hills Autonomous District Council (KHADC) bad Jaintia Hills Autonomous District Council (JHADC), kan long ha ka 28 tarik Rymphang.){kind=link}