Shillong, Nailur 16 : U Lat ka Jylla CH Vijayashankar ha ka sngi Ba-ar, ula pynbam smai ia ki 8 ngut ki Myntri ba thymmai jong ka Sorkar Meghalaya Democratic Alliance-II.
U Myntri Rangbah ka Jylla Conrad K Sangma, ula wanrah ia ka jingpynkylla ia ka Kynhun Myntri da kaba weng noh haduh 8 ngut ki Myntri kum ka sienjam ban ai bynta lem ia kiwei ba kin bat ia ka shuki Myntri jong ka Sorkar Meghalaya Democartic Alliance-II hadien ba kynjoh arsnem shiteng.
Napdeng ki Myntri kiba shah pynhiar shuki, saw ngut ki dei jong ka National People’s Party, arngut jong ka United Democratic Party bad mar uwei na ka HSPDP bad ka Bharatiya Janata Party.
Na ka NPP, ki MLA kiba la shimti bujli ia ka shuki Myntri ha ka Sorkar MDA-II ki kynthup ia u Timothy D Shira, u Brening Sangma, Bah Sosthenes Sohtun bad Bah Wailadmiki Shylla kiba dei na ka NPP. Kine kila shimti ia ka shuki na u AT Mondal, Rakkam A Sangma, Kong Ampareen Lyngdoh bad Bah Comingone Ymbon.
Na ka UDP, u President ka party Bah Metbah Lyngdoh bad Bah Lahkmen Rymbui kiba la shimti ia ka shuki Myntri bad bujli ia u Bah Paul Lyngdoh bad Bah Kyrmen Shylla.
Na ka HSPDP, u MLA ka Mawshynrut Bah Methodius Dkhar ula shimti ia ka shuki Myntri da kaba iabujli bad u Bah Shakliar Warjri.
Katba na ka BJP, u MLA ka South Shillong Bah Sanbor Shullai ula shimti bujli ia ka shuki Myntri na u Bah A.L.Hek.
Ha kane ka jingbujli Myntri, u Myntri Rangbah ka Jylla Conrad K Sangma ula pynneh tang ia ki Symbud Myntri Rangbah kata tang ia u Bah Prestone Tynsong, Bah Sniawbhalang Dhar bad u Myntri ka tnad PHE Marcuise Marak.
Ha kane ka jingpyntian smai la wan ban donlang u Myntri Rangbah ka jylla u Conrad K Sangma, ki symbud Myntri Rangbah u Bah Prestone Tynsong bad u Bah Sniawbhalang Dhar, u Chief Secretary ka jylla u Bah DP Wahlang, ki MLA, ki heh ophisar sorkar bad kiwei kiwei.
