Shillong, Risaw 25 : Ka Nongbah Shillong ka dei ka Nongbah ka bym ju lait na ka jingdheng kali naduh dang step haduh da miet bad kin don beit ki jaka/surok kiba ka jingdheng kali ka neh da ki kynta hynrei iano yn kynnoh?, ka daw tynrai hi ka dei namar ka jingrit palat jong ki surok kynthup naduh ki surok bah haduh ki shnong.
Ka long kaba eh palat ban pyrkhat ia ki lad ki lynti ban weng ia ki jingeh na ka jingdheng kali hapoh kane ka Nongbah jong ka Jylla. Ka jingeh hi ka dei ka jingbym lah shuh ban shna pynheh ia ki surok lada long ha kano kano ka rukom ruh namar ka jingbym don ia ki jaka ba kylluid ne kibym don jingtei ne ki Iing ki sem. Kat shaba phai da ki Iing ki sem suda.
Nalor kane ka jingeh, kawei pat ka dei ka jingnang bun jong ki kali kiba la nang kha roi na ka sngi sha ka sngi. Kane ka pyni ia ka jingkiew jong ka ioh ka kot ki nongshongshnong ka Jylla.
Ka Shlem ha ka jingwad bniah, kala shem ba ka East Khasi Hills kaba heh tang kumba 2752 Sq km bad ki nongshong shnong ba 8,25,922 ngut kat kum ka khana samari, 2011, ka don haduh 2,16,336 tylli ki kali kiba la register hapoh ka Ophis u District Transport Officer (DTO), kaba long palat shipawa ha ka jingdon briew.
La pyntip ba lai pawa na kane ka jingdon jong ki kali (2,16,333) ba kynthup naduh ki taxi kamai, ki kali ar shaka, ki kali shimet bad ki bos, ki dei kiba don bad ba iaid ba ieng manla ka sngi ha Nongbah Shillong.
Tang ki kali shimet ba don ha kane ka Nongbah ka Jylla (lait noh ki kali Sorkar) kila kot ia ka 1,19,853 tylli kat haduh u bnai Nailur 2023 bad ki kali ar shaka kila kot ia ka 91,345 tylli.
Khlem pat khein ia ki Auto Rickshaw bad ki kali Tourist (bym pat ioh jingkhein), ka jingdon ki taxi bala ioh permit na ka Ophis u District Transport Officer (DTO) ka East Khasi Hills, ban kamai hapoh ka District bad Nongbah Shillong, kala kot ia ka 5136 tylli bad jan baroh kine ki kali ki dei kiba wan rung beit sha Nongbah Shillong, kaba dei ka jaka pdeng jong ka khaii ka pateng.
Haba phai sha ka jingdon ki bos kamai, ka East Khasi Hills kala wan biang hakhlieh duh ha kaba haduh 1804 ki bos kila don hapoh kane ka District kiba iaid kamai na Nongbah Shillong sha kylleng ki shnong khapsor bad jaka nongkyndong.
Ban pynduna ia ka jingkhapngiah ia ka Nongbah Shillong ka long kaba eh bha hynrei kam dei pat ka kam ka bym lah ban leh. Ki lad ki lynti hi ki don bun hynrei kiei kiei baroh ki shong ha ka jingstad jong ki briew kiba bat ia u lakam ka synshar khadar ban weng ia kane ka jingeh.
