Shillong, K’lyngkot 17 : U Myntri Rangbah ka Jylla Conrad K Sangma ula niew ia ki khubor ba mih ha kawei na ki lad pathai khubor ba ong ba ka PA Sangma Statium ka dei kaba la pynbna bym shngain da ka District Disaster Management Authority (DDMA), ka dei ka khubor kaba bakla bad kaba pynman bakla.
“Ka jingshisha jong ka kam hi ka long kaba suk bha…Ka DDMA kala thoh sha ka Coal India ba ong ba sngewbha ai ia ka jaka ban ioh pyniar ia ka west stand (jaka shong sha sepngi) namar kane ka jingtei baroh kan ym long kaba shngain lada ngim ioh jaka na ka Coal India khamtam haba kane ka west stand ka dei kaba donkam ban shna noh mardor” ong u Conrad haba iakren bad ki nongthoh khubor ha ka sngi Saitjain.
Ula batai baka kynroh jong ka west stand kala khyllem dang shen bad ka Sorkar Jylla kala mang ia ka pisa ba T.45 klur ban tei biang ia ka.
Ka shithi ka DDMA sha ka Coal India ka long ban kyrpad ha kaban ai jaka ban ioh pyniar ia ka west stand bad ban shna ia ka surok sha ka shnong ba marjan.
U Conrad ula kyntu ia kane ka khot khubor ba kan da wad bniah bha hashuwa ban pynmih ia kano kano ka khubor.
“Nga kyntu ia ki lad pathai khubor ba ha jaka ban shu shongshit ba ioh khubor bad pynmih ia ka khubor khlem da wad bniah bha, kane kan wanrah tang ia ka jingsngew artatien ban shaniah ha kane ka kot khubor” ula ong.
, ka dei ka khubor kaba bakla bad kaba pynman bakla.){kind=link}