Aizawl, Iaiong16: Hadien ka jingther bom pathar kaba na suin ha Sagaing ha khappud ka Myanmar, ym shym la iohi shuh ia ki poiwir nong Myanmar ki ban dang wan poi thymmai sha ki bynta khappud ka Mizoram.
“Ym shym la sakhi shuh ia ki nong Myanmar sha ki bynta khappud ka Mizoram naduh kine ki khyndiat sngi ba la dep namar ka jingther bom kaba na suin da ki shipai ka Myanmar, ” Ong u heh sorkar.
Ka jingther bom ba shyrkhei kaba la jia ha ka 11 tarik mynta u bnai da ki shipai junta ka Myanmar ka la jia ha ka thain Sagaing, kaba shisien ka la kylla long ka ktem jong ki kynhun kieng atiar kiba ieng ialeh pyrshah ia ka sorkar India na ki jylla ka thain northeast.
Katto katne na kine ki kynhun kieng atiar ki dang iai bteng ban treikam ha kine ki jaka, ong u heh sorkar.
Haduh kumba 35,000 ngut ki phetwir nong Myanmar ki la wan poi sha Mizoram namar ki jingiaumsnam hadien ka jingkurup ki shipai ia ka bor synshar hapoh Myanmar ha kaba ki la don mynta ha ki ktem sah shipor ha ki bynta bapher bapher ka jylla.
Katkum ki heh sorkar ka jingkiew jong ka jingiap na katei ka jingther bom kaba na suin kaba la jia hajan ka sor rit ba pajih ka Kanbalu kaba la jia ha kane ka sngi ba Ar ba la lah kam pat long kaba shai, watla katta na ka liang ka sorkar ka ri (shadow National Unity Government (NUG) kaba don hapdeng ka jingphet rieh ka la ong ba ka jingiap jong ki briew ka la kot sha ka 165 ngut, kata kynthup naduh ki longkmie bad khynnah.
Ka India kaba ju kiar barabor ban kynthoh pyrshah ia ki jingleh jong ki shipai ka sorkar Myanmar naduh ba ki la kurup noh ia ka bor synshar ha u bnai Rymphang 2021, ha kane ka sngi Palei ba la lah ka la shim ia kane ka jingiaumsnam kum kaba pynthut ia ka jinglong jingman bad iai ban halor halor ka jingkyntu jong ka New Delhi na ka bynta ban weng ia baroh ki jingeh lyngba ka lynti jong ka jingsuk.
