Shillong, Risaw 20: Ka Naga Students Union Shillong (NSUS) kala kynnoh ba u Vice Chancellor ka North Eastern Hill University (NEHU) Prof Prabha Shankar Shukla, ula buhrieh ia ki jingshisha halor ka jingshah thombor (ragging) ba poi sha u pud ka jingshah pynlaw lyngkhuid jong u samla pule Naga, lyngba ki kam “shukor bad jingbym leh eiei”.
Kat kum ka jingong ka NSUS, u Vice Chancellor ula thet iala ka kti halor kane ka jingjia haba u ong hakhmat ki samla pule Naga ha ka jingialang hynnin ka sngi, ba um lah leh eiei shuh ia kane ka kam hadien bala ujor ejahar bad ki Pulit ka West Garo Hills.
Ka Union kala ong, ha ka jingshisha kane ka ejahar ba ujor ha ka 14 tarik Risaw kam dei satia kaba ujor da u Vice Chancellor ka NEHU, hynrei da u Director ka NEHU Tura Campus Prof Sujata Gurudev. Kila kynnoh ruh ba u Vice Chancellor ula kynran dien ruh wat na ka rai bala shim ha ka jingialang bala iadonlang bad u Resgistra kaba long ha ka 16 tarik Risaw.
Ha kane ka jingialang la rai ban aiti ia ka copy jong ka ejahar, ka kaiphod jong ka Fact Finding Committee bad ka shithi ba ka NEHU kala kut jingmut ban shim ia ki sienjam ba hap ban shim kat kum ka ain Anti-Raggingka UGC. Hynrei ka Union kala ong, u Vice Chancellor ula pynbna pynban ba kine ki kot ki sla ki dei ki “Official bad confidential” kaba mut ba ym lah ban ai.
Ka Union kala bynrap ba kam don satia ka ain kaba ong ba ia ka ejahar (FIR) dei ban buhrieh lane ym long ban ai ia ki paidbah lane sha ki bahaiing jong ki lanot.
“Namar ka jingiohbat ia kane, u VC hala ka jong ka jingthok bad kular kai, kala pynlong ia ngi ban artatien ia ka jingshim khia jong u ha kaban pynbeit ia kane ka kam bad ban pynioh ia ka jingbishar ba hok ia u lanot.
Kane ka pynsuba ruh ba une u VC ula pyrshang ban ai jingiada ia ki nongleh bymman bad ma u hi dalade u dei uba kyrshan ia ka ‘ragging’” ong ka NSUS.
Ka NSUS kala pynpaw ruh iaka jingpyrshah halor ka jingkren bym suidniew jong u Vice Chancellor haba kylli halor ka plan jong ka NEHU ban iarap ia une u samla ba kylla lanot.
La kynnoh ba u VC ula pynpaw hakhmat ki samla pule Naga ba ki bahaiing bahasem kin hap khmih hi ia ka jinglong jingman bad ba une u samla un tip hi dalade. Haba ki samla pule kila pyrshah ia kane ka jingkynnoh, u VC ula pynpaw b aka University kan sab uh ia uwei u doktor MBBS ban leit iasyllok ia une u samla.
“Ngi hap ban kew hangne ba u VC ym don jingtip satia ia kaei ka jingjia hapdeng u psychological counsellor bad u medical doctor. Namar kata, da ka jingsngewsih, u VC ula pyni hi dalade ba um shym la shimkhia satia ia kaei kaba la jia bad ula pyrshang pynban ban buhrieh ia ki jingshisha da ki kam shukor bad jingbym leh eiei” ong ka NSUS.
Ka NSUS kala pynpaw ba lada kane ki bor ka NEHU ki leh bym suidniew ban pynurlong ia baroh ki mat jingdawa, ka seng kam don lynti pat lait n aka jingleit hakhmat ka Ain bad ka Iingkashari nalor ban sdang ialum paidbah.
 kala kynnoh ba u Vice Chancellor ka North Eastern Hill University (NEHU) Prof Prabha Shankar Shukla, ula buhrieh ia ki jingshisha halor ka jingshah thombor (ragging) ba poi sha u pud ka jingshah pynlaw lyngkhuid jong u samla pule Naga, lyngba ki kam “shukor bad jingbym leh eiei”.){kind=link}