Shillong, Jymmang 04: U Myntri Rangbah ka Jylla Conrad K Sangma ha ka sngi Saitjain, ula kyrpad jur iaki Nongshong shnong ka Jylla ba kin iatreilang kum ka Shnong ka Thaw ban iada ia ki Catchment Area kiba lah ban duh noh, na ki kam tih mar bad ki kam kamai ja kpoh khnang ban tehlakam ia ka jingtyrkhong jong ki tyllong um hapoh ka Jylla.
Kane ka jingkynthoh jong ka dei kaba kongsan bha ha kum kane ka por ba ka Jylla kala mad ia ka jingtyrkhong um namar ka jingrngat lut ia ki tyllong um na ka daw ka jingkylla jong ka suin bneng.
U Conrad ula hiar jurip ia ka wahduid ha Umjasai, kab don ha khlaw Lawsohtun bad shem ba ka um kala rit bha.
La synran ia u CM da ki heh Ophisar jong ki Tnad bapher bapher ba kynthup ia ka Public Health Engineering, Shillong Municipal Board, Meghalaya State Pollution Control Board bad kiwei kiwei.
Haba kren bad ki lad pathai khubor ha Umjasai, u Conrad ula ong ba ka Shillong bad kiba bun ki jaka ka Jylla kila mad ia ka jingkyrduh um bad baroh ki tip ba ki don shibun ki daw kiba lam sha kane bad ka jingkylla ka suin bneng lem bad kiwei kiwei ki daw bad ka jinglong jingman ka suinbneng ki dei ki daw halor kane ka jinglong jingman baroh ba ngi mad mynta.
U pyntip ba ka Sorkar kala rai ban shim ia ki sienjam ha kaban tyngkai ia ki shyngiar bad ki wahduid bad ban pynkhie im ia ki lyngba ki technology bapher bapher kiba don ha kane ka juk mynta.
“Hynrei ki don shibun kiei kiei kiba ngi lah ban leh ha kaban pynthikna ba ngin lah pynduna ia kine ki jingeh bapher bapher ba ki paidbah kila mad bad ban sumar ia ki tyllong um ha ka lynti kaba dei. Dei da kane ka jingthmu ba kawei na ki sienjam ba ngi la shim ka long ba ngi la rai ban sumar bad pynkhie im ia ki shyngiar, ki wahduid kiba don ha kylleng ki jaka sor jong ka Jylla bad ban ialeh ha kaban pyllang ia ka um kat kaba lah da kaba pyndonkam ia ki technology bapher bapher kiba don mynta” ong u Conrad.
U Conrad ula ong “Kane ka jingjurip mynta ka dei ka nuksa. Ngi la wan sha wah Umjasai, kaba don ha kane ka khlaw ha Shillong bad ngi dang shu iohi ia ka um kaba lang, kaba la duna bha namar ka jinglong ka suinbneng kaba ngi la mad hynrei ha kine ki shisnem shiteng, ki tnad bapher bapher kila wad bniah ba kumno ngin lah pynkhie im bad pynheh ia ki jaka lang jong ka um ha kine ki wahduid. Kane ka dei tang ka nuksa”.
“Ki don haduh 7 tylli ki wah, kiba hap hapoh ka Shillong Municipal Board bad bun ruh kiba hap hapoh ki Tnad bapher bapher bad kumta, ngi lah ban tan ia ka um bad pynthikna ba ngin pyllang ia ka da kaba shna ia ki katto katn eki check dam , ka ban iarap ym tang ban pyllait ia ka um hynrei kan iarap ruh ban pynim bad pynheh ia ka jaka lang um ha ki wah” ula bynrap.
Haba kyntu ia ki nongshongshnong ba kin shim lem ia ka bynta kaba khraw ban iada ia ki tyllong um, u CM ula ong “Ha kajuh ka por nga kwah ban shim ia ka kabu ban kyrpad bad kyntu ia ki nongshongshnong ki jaka sor jong ka Jylla ba nalor ka jingkitkhlieh jong ka Sorkar, ka dei ruh ka jingbahkhlieh kum ka imlang sahlang ban tuklar lem ha kaban pynthikna ba ki jaka kiba don ha ki catchment area, kim dei ban shah pynjulor na ki kam kamai jakpoh lane ki kam tih mar. Ka long kaba kongsan ia ngi”.
