SHILLONG, JYLLIEW 21: Ki bor pyniaid District jong ka East Khasi Hills kila pynbna ba la khang ia ki paitbah bad ia ki kali ban iaid ha ka surok Shillong-Dawki hadien ba kala don ka jingtwa khyndew kaba jur bha ha ka surokbah hajan ka shnong Laitlyngkot hynne ka sngi u Blei.
Ha ka hukum kaba la pynmih da u Deputy Commissioner ka East Khasi Hills u Abhilash Baranwal ula ong, ba kala don ka jingtwa khyndew kaba jur bha ha ka surok Shillong-Dawki ha ka Chainage 25+200, hakhmat jong ka shnong Laitlyngkot kaba la lam sha kaban khang syndon ia kane ka surok.
Ka National Highways & Infrastructure Development Corporation Ltd (NHIDCL) kala khmih bniah ba ka jingmaramot bad ka jingpynwandur biang ia kane ka surok kan shim katto katne sngi, kaba la pynlong ia ki bor district ba kin khang khyrdep noh mardor ia kane ka surok na ka bynta ka bha ka miat bad ka jingshngain ki paitbah tad haduh ban da pynbna da kumwei pat.
Ki bor pyniaid district kila kyntu ia ki nongleit nongwan, kynthup ia ki nongjngohkai kiba thmu ban leit sha Dawki, ba kin kiar ban leit na katei ka bynta jong ka surok kaba don hajan Laitlyngkot hynrei ban shim da kawei pat ka lad da kaba iaid na ka surok Shillong-Sohra-Sohbar-Dawki ne Shillong-Jowai-Amlarem-Dawki.
La bthah ruh ia ki nongniah kali ba kidei ban bud ryntih ia ki jingkdew lynti kiba la pynmih da ki Pulit, ki nongpyniaid kali (Traffic) bad ki nongtrei ka NHIDCL kiba don ha katei ka jaka.
Dei ban pynkhreh lypa ia ka jingleit bad ban buh kylluid bha ia ka por bad ban iatreilang bad ki bor kiba dei khmih ban pynthikna ba kan don ka jingiaid beit iaid iaid ryntih ha ka rukom pyniaid ia ki kali.
Da ka jingwan ka aiom lyiur ha kylleng jong ka thaiñ, u DC ula kyntu ia ki nongleit nongwan ba kidei ban bud ryntih ia ki jingmaham ha kaba iadei bad ka jinglong jingman ka suin̈bneng kiba la pynmih da ka India Meteorological Department bad ban phone ha u nombar 112 ban ioh jingiarap haba don kano kano ka jingjia kaba kyrkieh.
