Shillong, Rymphang, 04: Hadien ka jingshah kyntait Ticket ha ka Party, u bah Michael Kharsyntiew ha ka sngi u la rai ban mih noh naka Bharatiya Janata Party (BJP) bad un iakhun noh kum u kyrtong shimet na North Shillong konstitwensi ha kane ka ilekshon ka ban long haka 27 tarik mynta u bnai.
Kumban shu pynkynmaw ka jur bha ka jingiaknieh Ticket ha North Shillong hapdeng u bah Mariahom Kharkrang u Ophisar IPS ba la shongthait bad u bah Michael Kharsyntiew bad naka liang ka BJP kala ai ticket noh ia u bah Kharkhrang.
Haba kren sha ki lad pathai khubor, u bah Michael Kharsyntiew u la ong ba kane ka jingshah kyntait Ticket ka paw shai ba ka BJP kam khein snep bad kam shahniah iaka jingtrei shitom jong u mynta la saw snem kynthih.
“Naduh u 2019 nga la trei na ka bynta u paidbah bad nga la long uba la ai ka jingshakri kaba hok ia ka party bad nga khlem mih na kawei ka party sha kawei pat ka party bad nga la iaineh hapoh ka Party hynre ka Party ka khein snep bad kam burom iaki kam ba nga la leh” la kynnoh u bah Michael.
Halor kane u bah Michael u kyntu ia baroh ki paralok bad nongkyrshan ba kim dei ban duh jingkyrmen namarba hynrei kidei ban long kiba husiar bad ban trei shitom namar ka jingiakhun kam pat kut tang namar ka jingshah pynduh Ticket.
Ula bynrap ba palat saw snem tam ula iai neh ha ka party bad ula la trei ban kyntiew ia ka jingpynrung kyrteng ia ki dkhot hapoh ka party hyrnei tang namar ba don ki briew kiba heh kyrdan kiba dang shu pyniasoh sha ka party tang saw bnai ki la kiew sha ka kyrdan Spokesperson, State Executive Member bad mynta ki ioh syndon ia ka tiket.
