Guwahati, K’lyngkot 19 :U MP ka Dhubri u Maulana Badruddin Ajmal ha ka 18 tarik mynta u bnai u la ong ba lada ka party Congress kam wan sha ka jingiasngewthuh jingmut lang bad ka AIUDF, kumta ruh kin duh noh ia ka Kaliabor constituency bad ka Nogaon constituency ha ki ilekshon Lok Sabha.
“Lada kim iatreilang bad ngi; Katno tylli ki Lok Sabha seat kin ioh? “Ka jingphiah ia ki constituency ka kham noh sha ka party AIUDF bad ka Congress kan mad ia ka jingeh lane kane ka national party kam wan sha ka jingiasngewthuh jingmut lang bad ka AIUDF”, ong utei u hehduh ka AIUDF uba la bynrap ruh ba lada ka Congress kam iatehlok bad ka AIUDF, ka Congress kan ym jop wat tang kawei ka seat ruh.” Ka Barpeta, Karimganj bad ka Dhubri Lok Sabha seat ki don ha ka list jong ka AIUDF’s list, ong u Ajmal.
U Ajmal u la pynlong ka jingleit jurip ia ka Dhubri ha ka sngi Balang ba la lah na ka bynta ka jingialang bad ka APDCL ha kaba la thaw ia ka committee hapoh ka jingialam jong une u MP na ka bynta ban weng ia kiba bun ki jingeh kiba iadei bad ki kam bording.
Kham hashwa, ka All Assam Students’ Union bad ka All India United Democratic Front (AIUDF) ki la pdiang sngewbha ha kaba iadei bad ka jingsdang jong ka jingphiah ia ki constituency hapoh Assam.
Na ka liang u general secretary ka AIUDF u Karimuddin Borbhuyan u la ong ba kane ka jingphiah ka dei ban long ha kata ka rukom ba ki paidbah kiba dei na baroh ki kynhun jaidbynriew ki dei ban ioh ia ki nongmihkhmat na ka liang jong ki.
“Kane ka jingphiah constituency ka dei ban long katkum ka 2021 census report, ym jong ka snem 2001.Ka jingpyntreikam ia kane ka sienjam ka dei ban long katkum ka juk jingstad.
