Guwahati, Rymphang 29 : U Myntri Rangbah ka Assam Himanta Biswa Sarma hynne ka sngi Palei, ula pyntip ba ka BJP kan pynieng kyrtong tang na 11 tylli ki constituency napdeng ki 14 tylli hapoh ka elekshon Lok Sabha ban wan ha Assam.
Haba iakren bad ki nongthoh khubor, u Himanta ula ong “ka BJP ha Assam kala dep pynkhreh ia ka thup jong ki kyrtong sha ka elekshon Lok Saha. Ka jingiakren halor ki kyrtong kan sa long mynta hi ka sngi na New Delhi bad yn rai ia kane ka thup. Ka BJP kan pynieng na 11 tylli ki constituency bad ieh ia artylli ki seat sha ka AGP kaba iatreilang bad kawei sha ka United Peoples Party Loberal (UPPL)”.
U la iathuh ba ia ka Barpeta bad Dhubri la ieh sha ka AGP ba kan pynieng ia ki kyrtong jong ka.
Ka khubor ka iathuh ba bun na ki nongialam ka BJP kila hiar sha Delhi hynne ka sngi bad kin sa iakynduh ia ki nongialam ba halor jong ka BJP.
Ka BJP hynne ka sngi, kala pynlong ia ka jingialang pdiang burom ia u Nongialam ka Congress u Rana Goswami, uba la wan ban pyniasoh noh sha ka BJP. Ia kane ka jingialang la pynlong ha Guwahati.
Une u Nongialam sain pyrthei ula iehnohkam n aka Congres ha ka sngi Balang.
