Guwahati, Rymphang 24: Ha ka sien kaba nyngkong, ka Bodoland University kan pynlong ia ka “Bodoland International Knowledge Festival” kaba saw sngi kynthih ha kane ka jaka pule naduh ka 27 tarik mynta u bnai.
Haduh kumba 300 ngut ki nonmihkhmat na baroh kawei ka ri India bad 35 ngut ki nongmihkhmat na ki 14 tylli ka pyrthei kin wan i€ashim bynta ha kane ka festival.
U nongioh khusnam jingsuk u Prof. Muhammad Yunus na Bangladesh un wan ban iashim bynta lang ha kane ka festival.
Haba kren sha ki lad pathai khubor, u Chief Executive Member ka BTR u Pramod Boro u la ong ba kane kan dei ka jingialang kaba heh tam ia kaba la pynlong da ka BTR. “Ngi kwah ban pynlong ia ka Kokrajhar bad ka BTR kum ki thymmei ha ka liang ka pule puthi, ban iasam lang ia ki jingtip bad kumjuh ha kaba iadei bad ki kam jngohkai pyrthei lyngba kane ka jingialang kaba heh,” ong u Boro.
U la ong ruh; “Lyngba kane ka tamasa jong ka jingnang jingtip, ngi kwah ban plie ia ki lynti jingiamir jingmut bad ka jingiashim bynta lang ban pynpaw halor ki jingeh kiba iadei bad ka imlang ka sahlang bad ka ban kyntiew ha kaba iadei bad ki jingnang jingtip ha ka liang ka saian bad ki ban long ka jingmyntoi ia ka imlang ka sahlang bad ban kyntiew ia ka ioh ka kot bad ka roi ka par.”
Ha kane ka festival yn sakhi ruh ia ka jingiasam lem ia ki jingnang jingtip ka ban iai bteng da ki kynhun nongshong shnong bapher bapher ha BTR.
