Guwahati, Naiwieng 25: U Myntri Rangbah ka Assam Himanta Biswa Sarma ha ka sngi ba-ar u la wanrah ia ka Assam Prohibition of Polygamy Bill, 2025 ne ka ain ban khang ka ri tnga bun ngut hapoh ka iing dorbar thaw ain, kaba long ka sienjam kaba khraw ban khang ia kane ka rukom shong lok ha baroh kawei ka jylla.
La wanrah ia kane da ka jingbit u Lamphang u Biswajit Daimary ha ka sngi sdang jong ka dorbar tlang. Kane ka bill kan pynlong kam runar ïa ka jingshongkha bun tnga da kaba shah set phatok haduh hynniew snem — bad haduh 10 snem lada u briew u buhrieh ïa ka jingïashongkha kaba la don lypa.
Kane ka ain kan treikam ha baroh kawei ka Assam lait noh tang ha ki jaka ba hap ha ka Sixth Schedule bad kan nym kynthup ia ki dkhot jong ki Scheduled Tribe kumba la batai hapoh ka Article 342 jong ka Riti Synshar ka Ri.
Ki kyndon kan dang pynheh shuh shuh ia ka jingkitkhlieh jong ki gaonburah, ki khlieh nongpyniaid shnong, ki qazi, ki kmie ki kpa bad ki nongsumar katkum ka ain. Kito kiba “buhrieh, leh klet ne pynslem khlem daw” ban pyntip ia ka jingshongkha bun tnga ki lah ban mad ia kajuh ka jingpynshitom kum ki nongleh kam sniew, kynthup ia ki jingpynshitom ia ki kum ki nongleh kam sniew bad ki nongpynshlur.
Ka jingwanrah ia kane ka Bill, ka la jia ha ka por bym don ki MLA ka Congress, CPI (M) bad Raijor Dal, kiba la pynlong ia ka jingiaid paidbah tang khyndiat por shwa ban wanrah ia ka, hadien ka jingiakren halor ka jingkhlad noh jong u nongrwai Zubeen Garg.Ia kane ka Bill yn sa rah ban ia kren biang kham bniah hadien.
Ha kajuh ka por, ka sorkar jylla ka la sam ruh ia ki kopi ba la print ha kaba iadei bad ka report jong ka Tewary Commission, kaba tohkit ia ka jingkulmar ha u snem 1983 bad ka jingshah pyniap jong ka Nellie. Kane ka Commission kaba la khlieh da u IAS ba la shongthait u T.P. Tewary, la thaw ia ka ha ka 14 tarik u Naitung, 1983, bad la aiti ia ka report jong ka ha u Jymmang 1984. Hadien la wanrah ia ka ha ka iing dorbar da ka sorkar AGP ha u snem 1987.
U Sarma u la ong mynshwa watla lada la wanrah da ki phew snem mynshwa, hynrei ia ka report ym shym la lah ban pynioh copy lut sha ki MLA, ha kaba tang kawei ka kopi ka don ha u Lamphang jong ka iing dorbar.
Ka sorkar ka la kdew ruh ia ka Mehta Commission, kaba la thaw da u Mukti Jujaru Sanmilan bad ki nongialam jong ka Assam Movement ban tohkit ia ki jingjia ba shyrkhei ha ka por ka jingiakhih pyrshah ia ka jingwan buhai shnong (anti-influx agitation) naduh u snem 1979 haduh u snem 1985 — ka por kaba la pyni da ki katto katne ki jingiaumsnam kiba shyrkhei tam ha ka histori jong ka jylla kiba kynthup ia ka jingpyniap briew ha Nellie, ha u snem 1983 jong u bnai Rymphang, ha kaba 2,100 ngut ki briew kila shah pyniap tang ha ka shi miet.
