Guwahati, Iaiong 27: Ka Vigilance Cell jong u Myntri Rangbah (CM) ka Assam ha ka 25 tarik mynta u bnai ka la rejistar mukotduma pyrshah ia u dkhot ka Rajya Sabha, u Ajit Kumar Bhuyan lem bad ia 13 ngut kiwei pat kaba kynthup ia ki heh sorkar ha kaba iadei bad ka jingkynnoh pyndonkam bakla ia ka fund jong ka Member ka Parliament Local Area Development (MPLAD) ha ka jylla. Ia kane ka mukotduma la ujor hapoh ka kashari ba kyrpang jong u nongbishar ha ka sngi ba Ar ba la lah, ong ka tyllong khubor.
Kiba la shah kynnoh donkti ki kynthup ruh ia ki ophisar ka civil service ka jylla, ha kaba sawngut na ki, kidei kiba la shah sospon ha ka 18 tarik u Lber ba la dep hadien ka jingpaw pyrthei halor ka jingshah kynnoh donkti bamsap lyngba ka jingpyntrei ia ki laitylli ki surok ha ka thain sepngi ka Assam ha Barpeta district.
Ka mangtyngka na ka bynta ka jingpyntrei ia ka surok la mang lyngba ka MPLAD fund jong u Bhuyan, hynrei ia ka bill la pyllait khlem da pyndep ia ka jingtrei kaba sahkut haduh 75 percent, ong ka khubor heh sorkar.Kitei ki sawngut ki ophisar ba la shah sospon ki la soi ia kane ka bill.
Hadien ka jingtohkit, ka Vigilance Cell ka la shem ba ia kitei ki laitylli ki surok ym shym la shna katba ia ka pisa la sei lyngba ki bill kiba shu shna thok.
U nongpathai khubor barim, u Bhuyan u dei u president jong ka Anchalik Gana Morcha, ka party sain hima hapoh ka thain.U dei ruh uwei na ki nongkynthoh pyrshah ia ka Citizenship (Amendment) Act jong u snem 2019.
