Assam | Ujor ka Congress sha ki Pulit ba kynnoh tuh vote ha ka Electoral Roll revision

Guwahati, K’Lyngkot 9: Ha shwa ka Assembly election ban jied ïa ki nongmih khmat sha ka ïing dorbar thaw ain ha Assam, ka Congress kaba don ha ka liang pyrshah kala ujor pyrshah ha Dispur Police Station, da kaba kynnoh “Vote Chori” (jingtuh vote) lyngba ka Special Revision (SR) kaba dang ïaid jong ka electoral rolls hapoh ka jylla.

Ia kane ka jingujor la mudui pyrshah ia ka seng kaba synshar ka Bharatiya Janata Party, ha kaba ki seng pyrshah ki la kynnoh ba ka BJP ka la pynlong ia ka Special Revision da kaba iatreilang bad ka Election Commission of India ban thmu ban leh thok ia ka thup jong ki nongthep vote.

Ha kine ki khyndiat sngi ba la dep, ka liang pyrshah ha Assam ki la kynnoh ba la pyndonkam bakla ia ka rukom pynkylla kyrpang (Special Revision) ban pynduh ia ki kyrteng jong ki nongthep vote ba shisha, khamtam kito kiba la shim ba kim dei ki nongkyrshan jong ka BJP, ha shwa ka elekshon ban wan.

Haba kynthoh tyngeh halor kane ka mat, u Deputy Leader ka Liang Pyrshah ha Lok Sabha bad u ba dei ruh u President ka Assam Congress u Gaurav Gogoi u la ong ba ka jingthep vote ka dei ka hok ba kongsan katkum ka riti synshar ka ri bad u la buh jingkylli mano ba la ai bor ïa kano kano ka seng saiñpyrthei ne nongïalam ban shim noh ïa kata ka hok jong ki nongshong shnong.

“Lada kum kine ki jingkren ki mih hakhmat ki Booth Level Officers, ka dei ka kam kaba khia kaba pynduh jingshaniah ha ka rukom jied nongmih khmat,” ong u MP ka Jorhat da kaba bynrap ba ki jingkren jong u president ka seng ki kit ïa ka jingkhia jong ka tnat treikam bad ki phah ïa ka dak kaba shyrkhei kaba lah ban buh jingma ïa ka elekshon kaba laitluid bad kaba hok.

U Gogoi u la kam ba ka synshar paidbah ka shong ha ka hok jong ki nongshong shnong ban pynpaw laitluid ïa ka mon jong ki lyngba ka vote, da kaba maham ba ka jingpyntieng ne jingpynduh ia ka hok ki nongthep vote ka ïaid pyrshah ïa ka Riti Synshar hi.

Ki liang pyrshah ki la dawa ban pynsangeh noh mardor ïa ka jingpynkhreh ïa ka Special Revision bad ki la maham ïa ki jingïakhih ha baroh kawei ka jylla bad ki la byrngem ban leh katkum ka aiñ lada ym shim ïa ki lad ki lynti ban pynbeit, da kaba khot ïa kane ka jingleh ba la kynnoh ba ka long “kaba pyrshah ïa ka synshar paidbah bad kaba pyrshah ïa ka riti synshar ka ri.”