Guwahati, Nailur 21 : U Nongialam ka Congress na Assam Debabrata Saikia ha ka sngi Balang, ula ujor ejahar pyrshah ia u Myntri Rangbah ka Assam Himanta Biswa Sarma ha Nazira Model Police Station, Sivsagar District namar ka jingkren pyn iashun briew ha ka Jan Ashirwad Rally ba long ha Vidhisha, Madhya Pradesh ha ka 19 tarik.
U Saijia ula ong “Nga hap ban ujor ia ka ejahar halor ka nongrim ka jingkren pyniashun briew jong u Myntri Rangbah ka Assam Himanta Biswa Sarma ha ka Jan Ashirwad Rally ha Madhya Pradesh myn ha ka 19 tarik Nailur”.
“Ha kano kano ka Sorkar ba pyniaid da ka ain, u Sarma ula btin lynti ia ki nongthep vote ha ka lynti kaba ijli haduh katta katta haba buh jingkylli ia u Kamal Nath, u Nongialam ba paw ka Indian National Congress halor ka jinglong niam Hindu. U Sarma ula ai jingmut ruh ba dei ban thang ia ka 10 Janpath”ong u Saikia.
U Saikia uba dei ruh u Nongialam ka Liang Pyrshah ha ka Iingdorbar Thaw Ain ka Assam ula ong ba u Sarma ula pynmih ia ka jingkynshoit kaba shai kdar ban leh ia ki kam umsnam bad wiang ding.
“Kane ka dei ka jingkynshoit ba shai ban leh ia ki kam umsnam bad wiangding. U dei ia kaban shah pynngat hapoh ka kyndon 153 bad 115/436 jong ka IPC” ong u Saikia.
Ula ong “Ka 10 Janpath ka dei ka jaka sah jong ka Sonia Gandhi, ka MP bad President barim ka Indian National Congress. Ka Sonia ka dei ka kurim iap lok jong u Myntri Rangbah Duh barim ka Ri India. Da ka jingai jingmut ba ia ka iingsah jong kane ka Longkmie ba 77 snem ban wiang ding, u Sarma um shym la kawang ktieh tang ia ki nongialam ba paw ka Liang Pyrshah hynrei ula khot paidbah ruh ban leit wiang ding ia ka Iing”.
