Guwahati, Rymphang 20: Namar ka jingjur ka jingdawa na ki nongshongshong jong ki lai tylli ki District ka Barak Valley, Assam, ka Sorkar Bangladesh kala pynkhreh ban plie noh sa kawei ka Visa Centre ha Silchar.
Ka jingthmu jong kane hi ka long ban pynsted ia ka jingai visa ia ki briew kiba kwah ban leit sha Bangladesh.
U Assistant High Commissioner ka Bangladesh ha Guwahati Rahul Amin ula pynbna ia kane ka rai baba kren halor ka jingdawa ia ki visa na Barak Valley, kaba kynthup ia ka Cachar, Karimganj bad Hailakandi District.
“Ka sngi ban plie ia kane ka jaka treikam ka dei kaban dang shim rai, hynrei kan sa long noh shen. Ia ki aplikeshon lah ban pdiang bad ia ki visa ban leit sha Bangladesh ruh lah ban ai noh na Silchar” ong u Amin.
U pyntip ba ka jingtyrwa ban plie ia ka iew khappud ha Harinagar Part II jong ka Katigorah ruh yn sa shong bishar bad kyrmen ba kan long kaba seisoh.
