Guwahati, Naitung 19: Myntri Rangbah ka Jylla Assam Himanta Biswa Sarma ha ka sngi Saitjain u la ong “Ngi la ialeh pyrshah ia ka jingwan buhai shnong ki Muslim na shiliang khappud na Bangladesh ym ban ialeh pyrshah iala ki briew lajong.
Ka thma ktien ka la thnem bha hapdeng ka Myntri Rangbah ka West Bengal Mamata Banerjee bad u Myntri Rangbah ka Assam Himanta Biswa Sarma.
Haka X, u Myntri Rangbah ka Assam u la ong, “Didi, ngan pynkynmaw ia phi— Ha Assam, ngim ialeh pyrshah ia la ki jong ki briew. Ngi ialeh pyrshah khlem jingtieng ia ka jingwan rung ki Muslim kaba dang iaid shakhmat na shilliang khappud ka ri Bangladesh kaba la wanrah ia ka jingkylla kaba shyrkhei ha ka jingbun briew. Ha ki katto katne ki distrik, ki Hindu mynta ki la don ha tmier ban kylla rit paid ha la ka jong ka ri”.
“Kane kam dei ka jingïathuh khana saiñ hima sima—ka dei ka jingshisha. Wat ka ïingbishar ba ha khlieh duh jong ka ri India ka la khot ïa kum kane ka jingwan rung tuh kum ka jingleh donbor nabar. Bad watla katta, haba ngi ialeh ban ïada ïa ka khyndew ka shyiap, ka kolshor, bad ka jinglong jong ngi, phi jied ban pynlong saiñ hima sima ïa ka. Ngim iaphiah ïa ki briew katkum ka ktien ne ka niam. Ki Assamese, Bangla, Bodo, Hindi ki ia ia lang hangne. Hynrei ym don ka jaitbynriew kaba lah ban im lada ka kyntait ban iada ia ki pud ki sam jong ka bad ia ka nongrim jong ka kolshor jong ka,” la ong u Himanta.
U la bynrap shuh shuh, “Katba ngi dang leh da kaba kut jingmut ban pynneh pynsah ïa ka jinglong jong ka Assam, phi, Didi, phi la pynthut ïa ka lawei jong ka Bengal—da kaba pynshlur ïa ki kam be-aiñ, ka jingwan rung tuh da kawei ka jaitbynriew kaba pynsngewbha ïa kawei ka jaitbynriew bad ka niam na ka bynta ki bank vote, bad ka jingsngap jar katba ka jingwan rung tuh ha khappud ka dang iaid tang naka bynta ban ioh synshar”.
“Ka Assam kan dang ialeh ban pynneh pynsah ia ka pateng jong ka, ka burom jong ka, bad ki briew jong ka—da ka jingshlur bad ka jingshai jong ka riti synshar” ula ong.
Ka thma ktien, ka wan hadien ba ka Mamata Banerjee, ka la ïalam ïa ka jingiakhih ha Kolkata da kaba pynrem bad kala batai ba ka dei ka jingshah thombor kaba nang jur jong ki nongbylla bylla Bengali ha ki jylla ba la synshar da ka BJP. “Lada kum kane ka jingshah lehbeiñ kan dang ïai bteng, ki jingïakhih kin mih ha kylleng ka ri,” ka la maham.
Ha u snem 2026, baroh ar tylli ki jylla kata ka West Bengal bad Assam ki don ia ka ilekshon MLA bad kila sdang ban kynnoh iwei ia iwei ban shim jingmyntoi ha ka por thep vote.
Ka TMC jong ka Mamata Banerjee ka la pyrshang ban thaw ia ka ktem ha Assam ha kaba bun bah ki Hindu Bengali ki shong ki sah hynrei ka TMC kam shym la leh eiei na ka bynta kaba ki Hindu Bengali kin iasoh bad ka TMC ba ialam ka Mamata Banerjee.
