Assam | Ther u Gaurav Gogoi ia ka BJP, dawa pynshisha ia ka song pisa ban iakhun ia ka jingshlei um

Guwahati, Nohprah 20: U President ka Assam Pradesh Congress Committee (APCC) Gaurav Gogoi u la ther tyngeh ia ka Sorkar Jylla ba ialam daka BJP bad dawa pyni iaki kot ki sla ban pynshisha iaka song pisa ba ai ka Sorkar Pdeng ha ka ban tehlakam ia ka jingshlei um bad ka jingtwa khyndew hapoh ka jylla.

Kane ka jing ther tyngeh u Gogoi ka long ha ka por ba u Myntri Rangbahduh ka ri u Narendra Modi un wan shapoh ka Jylla Assam ban plie paidbah ia ki kam pynroi.

Man la u snem ka jingshlei um bad ka jingtwa khyndew ka wanrah ia ki jingjynjar ia ki paidbah bad bun ki briew ki kylla long ki phetwir bad ki hap ban rieh tngen ha ki jaka sah ba shipor.

Ka jingshlei um bad ka jingtwa khyndew ka dei ka jingeh kaba la slem bha ha Assam bad man la u snem ka Jylla ka la duh ia ka jaka kaba heh bha namar ka jingtwa khyndew.

“Ngi kwah ba u Myntri Rangbahduh ka ri bad ka Sorkar Pdeng ba kin shimkhia bha ia ka jingeh jong ka jingshlei um bad ka jingtwa khyndew ha Assam. Ka Sorkar Pdeng ka dei ban pyni paidbah iaki kot ki sla kaba batai shai katno ka pisa ka la mang na ka bynta ban tehlakam ia ka jingshlei um bad ka jingtwa khyndew” la ong u Gogoi.

“Ngi kwah ïa ka jingïanujor bad ki Jylla kum ka Tamil Nadu bad Gujarat ban sngewthuh haduh katno ka jingïarap pisa ki la ïoh ha ki por ba jia kum kine ki jingjia ba sngewsih,” u la bynrap.

U la buh jingkylli katno ka Assam ka la ioh mynta na ka bynta ban leh iaka ba donkam haba don ka jingshlei um bad ka jingtwa khyndew.

Haka 7 tarik Risaw, ka Sorkar Pdeng ka la mynjur ia ka jingiarap kaba kot T.313.69 klur na ka bynta ka Jylla Assam na ka bynta ban iarap iaki ba shah ktah haka jingshlei um bad jingtwa khyndew ha u snem 2024.

Ha shwa ka ilekshon MLA 2026 ha Assam, kane kan dei ka sien kaba nyngkong eh jong u Myntri Rangbahduh ka ri u Narendra Modi ban wan sha Assam.