Guwahati, Jymmang 08 : Katba ki bor pahara ki dang pynkhlain ia ki khappud ka thain Mihngi hadien ka jingjia ha Pahalgam bad ka jingther namding ki shipai India ia ki ktem lehnoh ha Pakistan, kawei pat ka jingsngewkhia halor ka jingshngain kala mih ha Assam da ka jingioh kurup ia kaweika drone bala shna nabar Ri na ka jaka ba jngai tang da ki meter na khappud ka India-Bangladesh.
Ia kane ka drone la lap na kawei ka tnum iing ha Char Bazaar, ka shnong ba hap hapoh ka Sribhumi District ka Southern Assam, kaba jngai tang hapoh 100 meter na khappud ka Bangladesh.Kane ka jingjia kaba jia tang da ki khyndiat hadien ka jingther namding ki shipai India, kala pynsngewkhia jur halor ki kam syntiat ha khappud lane ka jingthmu ban rung hiar thma.
Ki Nongshongshnong kila iohi nyngkong ia kane ka drone bad pyntip mar mar sha ki bor ka ain. Ki Pulit ka Assam kila hiar mardor bad khang kut ia kane ka jaka ban pynlong ia ka jingtohkit. Kat kum ka jingong ki Pulit, na ki jingshem ha ka jingtohkit, la sub aba kane ka drone ka lah ban dei kaba wan na Bangladesh.
“Ha ka liang ka India, ka no fly zone kala treikam ha khappud ka Bangladesh ha Sribhumi. Ka jingwan jong kane ka drone kala pynpaw shai ia ka jingpynkhein ia kane ka kyndon” ong ki Heh Pulit.
Ki shipai BSF kila pynkhlain bha ia ka jingpahara bad ka jingpeit ngor haba iatrei ryngkat ryngkat ruh bad ki Pulit ban wad ia ka thymmei nangno kane ka drone ka wan.
