Guwahati, Risaw : Ka United Liberation Front of Asom (Pro-talk faction) ha ka sngi Balang kala pynbeit khatduh ia ka draft agreement (soskular) ban iasoi bad ka Sorkar Pdeng, ka ban pynkut noh ia ka jingkiengatiar bala palat 40 snem jong ka kynhun ha Assam.
Kane ka Kynhun bala wan iakren iasuk, kala iehnoh ia ki kam iaumsnam bad wan sha ka miej iakren iasuk ha u snem 2010 bad ka Sorkar Jylla kala pyllait lut ia baroh ki nongialam na along kynthup ia u Chairman Arabindaa Rajkhowa bad u Vice Chairman Pradip Gagoi.
“Ngi kyrmen ban iasoi ia ka soskular iasuk bad ka Sorkar Pdeng hashuwa ka elekshon Lok Sabha 2024” ong u General Secretary ka ULFA(Pro-talk) Anup Chetia haba iakren bad ki lad pathai khubor hadien ka jingialang jong ka General Council ka kynhun kaba long ha Wild Grass ha Kaziranga, Assam hynnin ka sngi Balang.
“Ngi la ai jingmut ban buh bhah ba shirta haduh 94 tylli ki Assembly constituency bad 8 tylli ki Lok Sabha ia ki trai padi riewlum ka Jylla ha kane ka soskular ba ngin tyrwa” ong u Anup Chetia.
“Ngi la wanrah bynrap ruh ia kawei ka kyndon ha ka soskular ban pynthymmai ia ka National Register of Citicen (NRC) da kaba buh ia u snem 1950 kum u snem ot kyrteng” ula bynrap.
Ha kajuh ka por, ka kyrwoh na ka kynhun ka pyntip ba ka General Council kala mynjur ia ka draft agreement kaba la pynkhreh da ka Working Council bad ka Central Executive Council da kaba kynthup bad weng noh ia ki katto katne ki kyndon.
Ka jingialang kala aibor ruh ha ka Central Executive Council ba kan iasoi ia ka soskular bad ka Sorkar Pdeng lem bad ka Sorkar Jylla.
Nalor kane, ka jingialang kala aibor ruh ia ka Working Council bad ki Centre bala buh thymmai ba kin pynkhreh khlem ka jingbakla ia ka thup kyrteng ki dkhot ba kyllon iap, kiba jah rngai bad kiba mynsiem bad ban aiti ia kane ha u General Secretary jong ka kynhun.
Ha ka 18 tarik Risaw, ki nongialam ka ULFA (Pro-talk) kila shong jingialang ha Guwahati bad ki katto katne ki Kmie/Kpa bad ki bahaiing hasem bad pynbna ia ka thup ki 13 ngut ki nongialam ba ki dkhot ka ULFA kiba jah rngai ha ka Operation All Clear bala pynlong ha u snem 2003.
