Dibrugarh, Jylliew 29: U Myntri Rangbah ka jylla Assam u Himanta Biswa Sarma, ha ka sngi u Blei u la leit khmih ia ka shnong Jatiyani kaba don ha Moran ban jurip ia ka Emergency Landing Facility (ELF) ia kaba la shna ha surok bah National Highway 2 (NH-2).
Shen ki lieng suin ia pom ne ki fighter jets kum ka Rafale, MiG, Tejas, Hercules, bad ka AN-32 kin sa lah ban hiar ha kane ka surok bah kaba don ha ka bynta jong ka Dibrugarh district’s jong ka thain Moran.
Kane kan long ka sienjam ba khraw ba ki lieng suin iapom bad ki helicopters jong ka Indian Air Force kin lah ban hiar ne landing bad kumjuh ruh ban her lyngba kane ka surok ha Upper Assam jong ka thain Moran.
U Myntri Rangbah u la jurip ia ka ELF, kaba la leh ia ki kam pynroi hapdeng ka Polo Club ha Khatkhati bad Tiloijan ha ryngkat ka jingshna ia ka surok four lane ba 11-km ha shi lynter ka NH-2. Ka surok ba 4.2-km kadei ka bynta hapdeng ka Polo Club bad ka Rassipathar la shna kyrpang ban lah hiar ki liengsun ne ia kaba la tip kum ka emergency landing operations.
Ha ka por ba don ka thma lane ka jingshah lyngshop ha ki bor jong ka mariang, kane ka surok lah ban pynkylla sha ka airstrip na ka bynta ki shipai Indian Air Force. La shna ia ka bynta kumba 4.2-km na ka surok ba 11-km highway, ia ka ELF la shna katkum ka juk thymmai mynta kaba lah ban kyrshan na ka bynta ka jingher bad ka jinghiar ki liengsun.
Kane ka project kadei ka jingsdang bad ka jingtrei lang ryngkat ka National Highways Authority bad ka Indian Air Force’s airfield construction division, ban pyntikna ka jingshngain ha ki por ba don operations, bad donkam ia ki kynroh ban ker ban khanglad ia ka jingrung ki briew bad ki mrad ha ka por ba iaid ki lieng suin. La shna ruh ia ka Air Traffic Control (ATC) tower.
Ia kane ka surok yn pyndonkam tang na ka bynta ki aircraft operations tang ha ki por ba donkam kyrkieh bad ha ki por ba long jai jai, un plie beit kumba ju plie ban pyndonkam lang ki paidbah ha ka iaid ka ieng.
Ka surok four lane ba 11-km na ka sor Moran sha Tiloijan la plie na ka bynta ki paidbah naduh ka shi tarik u Iaiong bad la khmih lynti ba u Myntri Rangbah duh u Narendra Modi ba un plie noh shen ia kane ka surok.
