Guwahati, Nohprah 31: Ha ka jingjia kaba sngew triem, ki shijur ki la shah pyniap ha ka rukom ba shyrkhei da ka jing shah thang im ha ki nongshong shnong halor ka jingsuba ba ki dei ki nongai ksuid ha Karbi Anglong District.
Katkam ka report, kane ka jingjia kala jia ha ka 30 tarik u Nohprah ha ka shnong No. 1 Beloguri Munda jong ka thain Howraghat.Kitei ki arngut ki lanot dei kiba la tip kyrteng kum u Gardi Birowa (43 snem) bad ka Mira Birowa (33 snem).
“Kine ki briew kiba donkti ban pyniap ia kine ki shijur kila thombor ia kine ki shijur da ki kynja tiar kiba nep hapoh ka ïing sah jong ki bad hadien ki la thang ïa ka ïing jong ki kaba la pynlong ïa ki ban ïap, ïa kine ki lanot la kynnoh da ki trai shnong ba ki nong ai ksuid” ong uwei u heh pulit.
Kham hadien katei ka jingjia, ki heh pulit ki la leit sha katei ka jaka bad ki la pynlong ia ka jingtohkit. “Ngi la sdang ia ka jingtohkit bad ngin kem ia baroh kiba donkti ha kane ka kam runar kaba shyrkhei.Ka jingngeit biej bad ka jingngeit matlah ka la pynlong ia ki briew ban leh ia kum kine ki kam”, la ong uwei pat u heh pulit.
Wat la ka don ka ain kaba pyrkhing bha kum ka Assam Witch Hunting (Prohibition, Prevention and Protection) Act, 2015 hynrei ki jingjia shah pyniap kiba shah kynnoh nong ai ksuid ki dang iai bteng ha ki bynta bapher bapher jong ka jylla.
“Ka dei ka jingjia kaba sngewsih haduh katta katta, bad ngi pynrem jur ïa kum kine ki kam.Namar ka jingbym nang thoh nang pule, ka jingngeit biej bad ka jingngeit matlah, kum kine ki jingjia ki neh hapoh ka jaitbynriew Adivasi.Ngin pynlong ïa ki prokram pynsngewthuh paidbah,” ong uwei u nongïalam jong ka All Adivasi Tea Tribes Students’ Association (AATTSA).
