Dibrugarh, Lber 10: Kawei ka longkmie adivasi ba 62 snem ka rta, ka la shah kynnoh nongai ksuid ne ka nongleh sniew ha ka kynhun ki kato katne ngut ki briew, ha kaba kila thombor bad pynshitom beain ïa ka hashuwa ba kin bret ia ka hajan kawei ka wah ha Romai, Dibrugarh hynne ka sngi Nyngkong.
Kane ka jingjia kala jia ha 1 No. Rajgarh ha Romai tea estate kaba hap hapoh ka Lahowal police station, Dibrugarh. Kane ka longkmie ka dei kaba la tip kyrteng kum- Monika Sanga, kaba shong basah ha 1 No. Rajgarh kaba don ha Romai tea estate ha Dibrugarh.
Ka kynhun jong ki pulit ka Lahowal, kila sei ïa kane ka longkmie, kaba la thiah lyngkthar bad ka jingshitom najan katei ka wah bad la pynkit ia ka sha jaka ai jingsumar ha Assam Medical College and Hospital (AMCH).
Haba pyntip sha ki lad pathai khubor u lok jong ka Sanga u la ong, “Ka kynhun ba 25 ngut ki briew kila thombor ïa ka kurim jong nga (Monika Sanga) hadien ba ki la suba ba kadei ka nongai ksuid” u la ong.
Shuh shuh u la ong, “Kawei ka kynhun ki briew ki la phone ïa nga bad ki la ïathuh ba ka tnga jong nga ka dei ka nongai ksuid bad dei na ka ‘jingleh sniew’ jong ka, ki briew kim da koit da khiah bha. Nga pyrshah ïa ki hynrei kila rung jubor hapoh ïing da kaba kila sdang ban jrong ïa ka lok jong nga bad kila patan bad bret shajan jong ka wah” u la ong.
U la ong, “Kine ki briew kila shoh la dat ruh ïa nga bad napdeng kine u Suraj Sanga, u Suraj Moni bad u Narju Sanga ki la shim ia ka bynta ba ha khmat ban thombor da kaba kila patan shabar ïa ka bad sdang jrong kti khlem kano kano ka daw bad mynta lok jong nga ka don hapdeng ka jingshitom ba jur”.
U Additional superintendent of police (HQ) u Nirmal Ghosh u la ong “Kane ka jingjia kala jia tang namar ka jingialeh pyrshah ha ka kam iing kam sem bad bynrap ruh ba ia mynta hi, kim pat lah ban ong eiei namar ba ka dang don ha ka jingtohkit,”.
U kurim jong kane ka briew u khlem pat ujor ejahar halor kane ka jingjia tad haduh ba thoh ia kane ka khubor.
