Dibrugarh, Rymphang 7: Uwei u nonghikai skul u la shah kem hadien ba uwei u khynnah skul ba dang 14 snem ka rta la kynnoh ba u la khlad na ka jingmynsaw ha une u nonghikai, ha ka skul shimet kaba don ha Tinsukia, kaba la pynmih ïa ka jingpyrshah kaba jur bad ka jingbitar paidbah.
U Utpal Taye, uba dei u khynnah klas 8 jong ka Sankardev Sishu Niketan ha Philobari, u la shah kynnoh ba u la shah thombor ha u nonghikai u Sanjeev Sharma ha ka por leit skul ha ka 5tarik u Rymphang halor kaei kaba ki tyllong khubor ki la batai ba ka dei ka daw kaba rit. La iathuh ba une u khynnah pule u la mynsaw jur bad la pynkit mar mar ia u sha Assam Medical College & Hospital (AMCH) ha Dibrugarh.
Wat hapdeng ka jingsumar, u Utpal u la khlad noh na ka jingmynsaw jong u ha ka miet jong ka sngi Thohdieng.
Ka khubor jong ka jingïap jong utei u khynnah ka la mih ka jingïakhih kaba jur ha ka step jong ka sngi Saitjaiñ, ha kaba ki nongshong shnong bad ki kmie ki kpa kiba la bitar ki la ïalum lang shabar jong ka jaka skul.
Ki nongïakhih ki la thang ïa ki tyre kali, bad ki la pakhang ïa ki surok ha Philobari Tiniali, bad ki la pyrta slogan ban leh da kaba tyngeh pyrshah ïa utei u nonghikai ba shah kynnoh.
Katto katne ki sengbhalang na ka thain ki la ia snoh kti lang bad kane ka jingiakhih, kila dawa ia ka jingtohkit kaba ha khlieh duh ha ka kyrdan ki high level halor kane ka jingjia.
Ki nongïakhih ki la kynnoh jur ruh pyrshah ïa ki bor pynïaid jong ka skul, da kaba kynnoh ba ki pyrshang ban khniot ïa katei ka kam bad pynslem ban pynpaw hok ïa katei ka jingjia sha ka longïing.
“Kane kam dei ka discipline — kane ka dei ka jingpyniap briew.Kumno u nonghikai u lah ban shoh ia u khynnah da kaba shyrkhei? Ka skul ka la pyrshang ban sngap jar ha ka jaka ban pyntip mardor ia baroh,” la ong uwei u kmie u kpa uba pyrshah.
U Utpal, u khun jong u Ganesh Taye na ka shnong Kopahtoli kaba don ha ka thain Amguri jong ka Sivasagar district, u la pule ha katei ka skul naduh ka Class 1 bad u sah ha katei ka Hostel.
U Mayank Kumar, Senior Superintendent of Police ka Tinsukia, u la pynthikna ba la registers case bad la kem ruh ia utei u nonghikai ba shah kynnoh.
“Ngi la kem ia utei u nonghikai bad pynlong ia ka jingtohkit kaba bniah, baroh ki liang jong kane ka kam ki dang eksamin”, la ong u SSP.
Kane ka jingjia ka la pynmih biang ïa ka jingsngewkhia halor ka jingpynshitom ha ki skul bad ka jingshngaiñ jong ki khynnah hapoh ki jaka sah, ha kaba ki sengbhalang ki dawa ban pyntreikam kham pyrkhing ïa ki aiñ ban ïada ïa ki khynnah. Ka jingtohkit kaba kham bniah ka dang iaid shaphrang.
