Guwahati, Iaiong 08: Hapdeng ka jingkhynra kaba jur ban ioh kem ia ki dkhot jong ka kynhun Popular Front of India (PFI), ki bor pulit ka Assam mynta ka sngi Saitjain ki la ioh ban kem noh ia arngut ki nongialam jong ka kynhun PFI ba la khein be-aiñ na Barpeta district jongka Assam.
Ia kitei ki nongialam la ioh ban kem noh napoh Barpeta Railway Station ryngkat bad uwei pat u dkhot jong ka Campus Front of India (CFI).
Kitei ki arngut ki nongialam ka PFI la tip kyrteng kum u Zakir Hussain bad u Samad Ahmed, katba ia u dkhot jong ka CFI member la tip kyrteng kum u Jahidul Islam Mirdha.
Kine ki nongialam kidei kiba la don hapdeng ka jingphet rieh naduh ba ka tnat National Investigation Agency (NIA) ka la pynlong ka jingkhynra pyrshah ia ki dkhot jong kane ka kynhun seng naduh kaba sdang jong u snem ba la dep.
Na ka liang ki bor pulit ka Assam ki la pynlong ka jingkhynra kaba jur pyrshah ia ki dkhot jong kane ka kynhun PFI naduh u snem ba la dep bad haduh mynta kiba bun ki dkhot bad ki nongialam kiba don bynta bad kane ka kynhun ki la shah kem noh.
Katkum ki khubor la ong ba u Samad Ahmed u dei u President jong ka PFI Assam State Committee, u Zakir Hussain u dei u secretary jong ka State Committee katba u Jahidul Islam u dei u President jong ka CFI Assam Committee.
Katkum ki khubor na ki bor pulit, ia utei u nongialam ka CFI la ialam noh da ki bor pulit ka Assam hynnin ka sngi Thohdieng hapoh ka jingialam jong u heh pulit uba ha ka kyrdan DSP ha Bellundur, Bengaluru.
Shuh shuh katkum ki bor pulit la ong ba u Amir Hamza u dei uwei na kiba la shah kynnoh donkti bad uba la shongrieh ha Bengaluru ha ryngkat ki katto katne ki dkhot ka longiing kiba dei na Tripura.
Na ka liang u Additional Chief Metropolitan Magistrate ka Bengaluru u la pynmih ia ka hukum ban set ia u Hamza lai sngi kynthih hapoh ka jingpeit ki pulit ka Assam hadien ba la ioh ban kem noh ia u.
La ong ba u Hamza la pynkynriah noh sha Guwahati.
Ki heh pulit ki la ong ba u Hamza u dei u nongshong shnong jong ka thain Baksa district ka Assam bad u la don hapdeng ka jingphet rieh naduh ba ka sorkar pdeng ka la pynmih ia ka hukum khang pyrshah ia ka kynhun PFI.
