Guwahati, Iaiong 4: Hadien saw snem ka jingiai bteng ban wad ha ki lai tylli ki Jylla, ki Pulit ka Assam kila ioh ban kem ia 5 ngut ki briew kiba la thwet naduh ka jingjia knia briew ha Kamakhya kaba jia ha u snem 2019.
Kine ki san ngut ki dei kiba la tip kyrteng da u Mata Prasad Pandey ba khot sin u Mateswar Giri (50), Suresh Paswan (56), Pradeep Pathak (52), u Dinesh ne Raju, Kanu Acharjee ba khot sin u Kanu Tantrik (62) bad u Bhaiyaram Maoriya (60) ba khot sin u Raju Baba.
Kat kum ka jingpyntip ki Pulit, u Mata Prasad ula shah kem na Jabalpur, Madhyra Pradesh katba u Pradeep Pathak ula shah kem na Mathura, Uttar Pradesh bad ia kiwei pat la kem na Bhootnath, Guwahati.
Ki Pulit kila shem ia kawei ka met ba khlem khlieh jong kawei ka briew ha Kamakhya marjan ka Joy Durga Mandir ha u bnai Jylliew 2019 bad ia kane ka met la sop da ka kombor katba ka khlieh kala jah rngai.
“Halor kane ka jingia, ki Pulit kila register ia ka suo moto case ha Jalukbari Police Station bad ka jingtohkit kala iaid shakhmat. Namar ka jingbym lah ban ithuh ia kane ka met ba iap, kumta ki Pulit kim shym la ioh sakhi ha kaba sdang. Hynrei ha ka 28 tarik Naitung, 2019, u Khun jong kane ka briew ba kyrteng u Suresh Shaw na Tatipara (Borkandaspara), West Bengal, ula wan sha Jalukbari Police Station hadien ba u ioh jingtip na ki lad pathai khubor halor ka jingioh ia ka met ba khlem khlieh jong kawei ka briew bad haba khmih ia ki riam ki beit bad kiwei ki dak ha ka met kumki tattoo bad kiwei kiwei, une u Khun ula pynithuh ia ka Kmie kaba la tip kyrteng ka Santi Shaw (64), kaba la wan sha Kamakhya kum shibynta jong ka Ambubachi Mela ha u bnai Jylliew 2019” ula pyntip.
Dei hadien kane ka jingpynithuh ia ka metiap, ki Pulit kila nang pynjur ia ka jingtohkit bad thung ruh ia ka Special Team ka ban wad ia ki briew kiba donkti. Kane ka kynhun kala shong bishar ia ki sakhi satar bala ioh lum bad dei na kine ki sakhi ba kila leit sha Cooch Behar, West Bengal ban pynlong ia ka jingkhynra ia ka Iing jong uwei u briew ba kyrteng u Kailash Barman ha ka 18 tarik Lber ha kaba kila ioh ban kurup ia ka mobile phone jong ka Santi Shaw lem bad ki jain, ki ID (Aadhar Card) bad kiwei kiwei.
Ha ka jingtohkit ia u Kailash Barman, ki Pulit kila ioh ksai ba ia kine ki tiar la ieh ha iing jong u da uwei u Baba (sadhu) ba kyrteng u Mata Prasad Pandey, uba shong ha Jabalpur, Madhyra Pradesh bad ia kine ki tiar la ieh naduh u bnai Jylliew jong u snem 2019. Kumba batai u Kailash, u Mata u ju wan barabor sha ka Shnong jong u hapdeng u bnai Jylliew bad Naitung mynta la 7-8 snem.
Ki Pulit kila ioh kem ia u Mata Prasad Pandey ba khot sin u Mateswari Giri na Jabalpur, Madhya Pradesh ha ka 25 tarik Lber, 2023 bad hadien ka jingtohkit, la ioh ksai b aka miet 18 bad 19 tarik Jylliew 2019, la pynlong ia ka Puja ha Bhootnath kaba kila ai kyrteng ka Kapali/Kaal Bhairav/Kali Puja ha kaba haduh 12 ngut ki briew kila wan iashimbynta kynthup ka Santi Shaw. Hadien kane, kila leit sha Kamakhya bad kila khrai khlieh ia ka Santi Shaw, ong ki Heh Pulit.
