Guwahati, Jylliew 16: San ngut ki briew kila shah kem hadien ka jingshah kynnoh ba ki donkti ban leit ban bret doh masi hajan ka Kali temple ha Assam kaba hap hapoh ka Goalpara district, bad na ka liang ki bor pyniaid kila suba ba kane ka jingleh ka long ban wanrah ia ka jingsngew pher jaitbynriew hadien ka jingrakhe ia ka Eid-ul-Zuha.
Kine kiba la shah kem la tip kyrteng kum u Bodir Ali (57), u khun jong u (Late) Jabber Ali, u Hazarat Ali (58), u khun jong u Riaj Uddin, u Tara Mia (36), u khun jong u Rupchand Ali, u Shajamal Mia (42), khun jong u (Late) u Hazarat Ali, bad u Jahangir Alom (32), khun jong u Late Amor Ali.
Haba pyntikna ia kane ka jingshah kem, u myntri rangbah ka jylla Assam u Himanta Biswa Sarma u la buh ha ki social media ha kaba u la thoh ha ka X: “Ki Pulit ka Lakhipur jong ka Goalpara district kila kem ia san ngut ki kiba la shah kynnoh ba bret doh masi hajan ka temple da ka jingpyrshang ban wanrah ia ka jingia sngewpher jaitbynriew hadien ka jingrakhe ia ka Eid-ul-Zuha.”
Kane ka jingjia kala jia ha ka sngi Saitjain ha ka thain Lakhipur, ha kaba la lap ia ka doh masi hajan ka Kali temple.
Kane ka jingjia ka phalang kumjuh kum ka jingpynshit ban wanrah ka jingsngew jaitbynriew ha kawei na ki district ba ia jan ha Dhubri district, ha kaba la lap ia ka khlieh masi hajan ka Hanuman temple ha ka miet kaba ar. Ki pulit kila kem haduh 38 ngut ki briew kiba ia donkti ha kane ka kam.
Na ka liang ki bor ba dei peit, ki dang tohkit bha ha kaba iadei bad kine ki ar tylli ki jingjia kiba lah ne pyrshang ban wanrah ia ka jingsngewpher jaitbynriew hapdeng ki paidbah nong shong shnong.
