Assam | Sdang rung ki BLO ha man ki thliew iing ban pynthina ia ki nongthep vote ba shisha ha Guwahati

Guwahati, Naiwieng 25: Ka jingpynshisha na kawei ka iing sha kawei pat ia kaba la leh da ka Booth Level Officers (BLOs) mynta kala iaid sha khmat ha kylleng ki jaka jong ka Guwahati ban pyntikna ia ka thup ki nongthep vote kiba tikna bad kidei hok shisha.

Ka Election Commission of India (ECI) kala sdang ia kane ka Special Revision (SR) of Electoral Rolls 2026, ha kaba ki BLOs ki dang pynlong ia ka physical verification jong ki nongthep vote. Ka jingpynshisha na kawei ka jingkhang sha kawei pat la sdang mynta u bnai Naiwieng ka 22 tarik bad kan iai bteng haduh ka 20 tarik u bnai Nohprah 2025.

Ka jingthmu ba kongsan jong kane ka jingpynshisha, ka long ba ki BLOs ki pyndonkam da ki register ba la pyndap lypa ban pynthikna ia ki jingtip jong ki nongthep vote bad u khlieh duh jong ka iing lane kiwei pat ki dkhot jong ka iing kiba dei hok.

Ka jingpynshisha kaba dang iaid mynta shakhmat ka thmu ban tip ne ithuh ia ki dur jong ki briew ki bym dei hok ne ki dur ki bym dei, kiba la pynkylla ia ki dur kiba la jah ne kiba duna ka jingbha (low quality), ban lap bad pynbeit ia ki jingthoh ba iapher bad ka jingpynthymmai ia ki kyrteng lyngba ki Form 6, 7, bad 8.

U Indrajit Goswami, uba dei u nong shong shnong ha Guwahati, u la pynpaw ia ka sur khleh lang ha kaba iadei bad kane ka bynta jong ka jingpynshisha.

U la ong: “Lada ka BLO ka treikam bha, ngam tharai ba kan long kaba sniew. Hynrei ha kaba don ki D-Voter ne ki issue jong ki briew kiba rung na Bangladesh, ka lah ban don ka jingeh.”

Kito kiba wan nabar—kum na Bihar ne Mumbai—ki lah ban ioh pynrung kyrteng hangne, bad hadien san snem ki leit phai biang bad ki ioh kyrteng sa shawei pat. Te kaei ka ban sa jia mynta? Kane ka lah ban dei ka jingeh.

“Kaei ka jingthmu jong ka Election Commission?Ngi kum ki riew paidbah kiba kyllum lang ngim tip. Hynrei ka thup nongthep vote kaba biang ka dei ban kynthup lypa ia ki nongshong shnong India ba shisha; lym kumta kan long kaba eh ia ngi ha ki por ban wan.”

Ka Hiranmoyi Das, kaba 93 snem ka rta kaba shong ba sah ha Chandmari, ka iathuh ia ka jingsngew jongka halor kane da kaba ong, “Ha kane ka rta, nga lah ban iohi ia kane da la ki jong ki khmat.Ka sorkar ka shim khia ia ngi mynta— mynshuwa kim ju leh. Mynta, ha ka sien kaba nyngkong, nga pyrkhat ba ka long kaba bha.”

Ka BLO Piyali Das ka la batai ia ka rukom treikam ba la bud ha ka por ba pynlong ia ka jingpynshisha da kaba bynrap, “Ngi rah ia ki form baroh ryngkat bad ngi— ka form 6, ka form 7, bad ka form 8. Lada don kino kino ki bym pat pynrung kyrteng, ngi pyndap mardor ia ki form jong ki khnang ba kin ym iakynduh jingeh. Ngi dang shim ruh ia ka Form 7 na ka bynta ki jingpyndam lada donkam. Lada don kiba kwah ban pynkylla kyrteng ne jaka sah, baroh la pynbeit ha ka jaka. Kane ka dei ka bynta kaba bha tam—baroh la leh lang, bad kan ai jingmyntoi ia baroh.”