Guwahati, Risaw 08 : U Myntri Rangbah ka Jylla Himanta Biswa Sarma ula pyntip ba ka Sorkar Jylla kala aiti sha ka Central Bureau of Investigation (CBI) ban tohkit ia ki 41 tylli ki case bala register jong ka jyrsieh Online Stock Trading.
U Himanta ula pynbna ia kane hynne ka sngi Ba-ar haba pynthikna ba ka Sorkar kan ai ia ka jingiatreilang kaba pura bad ka CBI ban lah pynsted ia ka kam ha kaban pynioh ia ka jingbishar kaba hok ia ki briew kiba donkti.
Ula pynbna ia kane haba kdew ia ka jingpynbna bala pynmih da u Under Secretary ka Sorkar Pdeng Satyam Srivastava.
Kane ka jingpynbna ba 8 tarik Risaw 2024, ka ai ia ka bor bad ia u pud u sam jong ka CBI hapoh ka Dehi Special Police Establishment Act, 1946, ban tohkit ia kine ki case ha Assam.
Ka jingpynbna kala pynthikna ba ka Sorkar Assam kala ai ia ka jingbit da ka ingthoh ia ka CBI ban shimti ia ka jingtohkit.
Kane ka jingaiti sha ka CBI kala wan jia ruh ha ka por ba ki paidbah kila pynpaw ia ka jingsngewkhia halor ka jingjyllei kine ki jyrsieh Online Stock Trading.
Haba thoh ha X, u Myntri Rangbah ka Assam ula ong “Ban pynthikna ia ka jingtohkit kabym shah liang halor ka jyrsieh Online Stock Trading, ngi kyrpad ia ka Sorkar India ban aiti ia baroh 41 tylli ki case bala register sha ka CBI. Ka CBI kala shimti ia kane ka kam bad ngin ai ia baroh ki jingkyrshan ban pynthikna ba kiba donkti kin ioh ia ki jingpynsajia kham kloi”.
 ban tohkit ia ki 41 tylli ki case bala register jong ka jyrsieh Online Stock Trading.){kind=link}