Guwahati, Nailar 27: U Myntri Rangbah ka jylla Assam Himanta Biswa Sarma ha ka sngi Balang u la ong ba ka hukum ban shu siat beit hajuh ia ki briew kaba pynmih huri hura ha ka por leh kmen Durga Puja ha Dhubri District kan dang iai trei kam, da kaba kdew ba ka jingjur ka jingsngewkhia ha kaba iadei bad ka jingbym shngain ha khappud Indo-Bangladesh.
Haba kren bad ki lad pathai khubor ha Lok Seva Bhawan in Guwahati, u Sarma u la ong ba ka shongsuk shongsain ka don ha kiba bun ki bynta jong ka jylla Assam, ka Dhubri bad ka South Salmara ki don ka jingsngewkhia namar ba ka don ha khappud.
“Ka South Salmara kam shym la don kano kano ka jingjia kiba sniew ha kine ki san snem ba la dep. Hynrei ka Dhubri ka long kaba iapher. Dang shen, bun ki nongshong shnong ki la ioh pdiang ia ka phone na Bangladesh, ki jingthoh ha ki poster kiba kyntu ban kyrshan ia ka Bangladesh bad wat ia ka Islamic State. Ki don shibun kum kine ki kam kiba iaid ha Dhubri”, la ong u Sarma.
U myntri rangbah ka jylla u la ong ba ka Durga Puja ka dei ka por ba lah ban pyrshang ban pynthut ia ka shongsuk ka shongsain. “Ngi sheptieng ia ki katto katne ki kam kiba lah ban wanrah ia ka jingkulmar. Dei na kata ka daw ba ngim weng noh ia ka hukum ban siat beit ia ki briew kaba la pynmih kham mynshwa. Ka hukum kan iai bteng”,u la bynrap.
Haba pynpaw ïa ki kam pahara ba dang shen, u Sarma u la ong ba ki pulit ki la kem ïa uwei u Ali Hussain Bepari, uba la suba ba u don ka jingïadei bad ka seng ba la khang pyrshah ka Jamaat-ul-Mujahideen Bangladesh (JMB).
“U la ak kum u nongpyniaid, da kaba ai ia ki nombar phone jong ki briew na Dhubri sha ki briew ha Bangladesh. U la shah kem teng kham mynshwa ha ki case kiba iadei bad ka JMB, hynrei u la lait jamin, bad mynta u ia don bynta biang ha kum kine ki jaitkam”, la ong u CM da kaba bynrap ba ka jingtohkit ka dang iaid shakhmat bad ki pulit ki ngeit skhem ba kin sa lap kloi ia katei ka case.
