Guwahati, Lber 13: Ka Secondary Education Board of Assam (SEBA) ka la hap ban pynsangeh noh ha kaba iadei bad ka eksam HSLC jong ka sobjek Science hadien ba ka jingkylli la kynnoh ba ka la lait tuh lyngba ki social media hynnin ka sngi U Blei.
“Ia ka eksam na ka bynta ka General Science jong ka HLSC kaba dei ban long mynta ka 13.03.2023 la hap ban pynsangeh noh da ka SEBA hadien ka jingmih khubor kaba iadei bad ka jinglaittuh ka jingkylli.Ia ka tarik ban pynlong biang ia kane ka eksam yn sa pyntip kham hadien,” ong u Myntri ka tnat pule puthi lyngba ka twitter.
Na ka liang ka board kam pat shym la pynbna ia ka tarik bathymmai na ka bynta ban pynlong biang ia kane ka eksam jong ka sobjek science.
Kham hashwa, ia ka eksam Higher Secondary Leaving Certificate lane ka Assam HSLC Exam 2023 la hap ban pynsangeh noh ban thok ia ka sobjek English.
Katkum ka jingpyntip ba la pynmih da ka SEBA, la pynsangeh noh ban thok ia ka sobjek English ha kawei na ki centre hapoh Cachar district.
Kumjuh ha ka sngi kaba bud, ka jingkylli jong ka sobjek Mathematics jong ka eksam High School Leaving Certificate (HSLC) ruh ka la laittuh ha ka 6 tarik mynta u bnai.
Ki tyllong khubor ki la ong ba mynta u snem namar ka jinglaittuh ki jingkylli ka la wanrah ka jingeh kaba khraw ia ki khynnah pule. “Dei ban pynlong ia ka jingtohkit kaba bniah.Mano ba donkti halor ka jinglaittuh ki jingkylli,” ong ka tyllong khubor.
