Dibrugarh, Nailar 12: Kawei ka Madrassa kaba ym shym la ioh satia ia ka jingmynjur na ka sorkar, la kynnoh ba kala shah pynpra noh ha ki trai shnong jong ka Tinsukia, Assam ha ka sngi u Blei.
Kane ka jingjia kala jia ha ka shnong Lohari Kachari kaba don ha Tinsukia.
Katkum ki report, la iathuh ba ki dkhot jong ka mosque committee, kila shah pynbor ha ki paidbah nong shong shnong jong kane ka thain ban pynpra noh ia katei ka Madrassa.
Shuh shuh la kynnoh ba katei ka Madrassa mynta kala pyniaid ne trei kam la kumba shi snem khlem da ioh ka jingmynjur na ka sorkar jylla. Ia kane ka Madrassa la kynnoh ruh ba la pyniaid da u wei u Noor Islam.
“Hadien ka jingshah pynbor ha ki paidbah, ki dkhot ka mosque committee kila wanrah da kawei ka puh shilum bad pynpra noh ia ka.Ka committee kala pynpra ruh ia ka kynroh jong ka mosque, kaba don marjan bad ka madrassa, namar ba ia kane ka kynroh la shna hapoh jong ka nala” ong ki heh ophisar.
Katkum ki trai shnong, ia kane ka kynroh la pynieng hapoh ka jingpeit jingkhmih jong u Noor Islam uba ia don lang ha ka sngi ba pynpra ia katei ka kynroh.
Kane ka jingsdang ka dei ka jingthmu ka committee jong ka mosque, u ophisar ba dei peit ia ka Tinsukia Sadar Police Station u ia don lang ha ka por ba pynpra ia katei ka kynroh.
Ka sorkar Assam ka la shim ia ka sienjam kaba tyngeh pyrshah ia ka jingwan rung be-ain ia ki jaka sorkar bad haduh mynta la lah ban pynkhuid ia ki jaka sorkar kiba heh bha kiba la shah knieh beain lyngba ki jingkyndang ne pynkynriah briew jong ka.
