Guwahati, Iaiong 26: Ki dkhot jong ka seng All Assam Students’ Union (AASU) hynnin ka sngi ba Ar ki la pynlong ka jingiakhih ha ki bynta shatei ka Assam hapoh Dibrugarh ban pynpaw pyrshah halor ka jingkiew dor jong ki mar ki mata ba kongsan.
Ki dkhot jong ka AASU Dibrugarh district unit ki la pynlong ka jingiakhih da kaba rah ryngkat ki banar bad postar napoh ka madan jong ka skul Government Boys’ High School barim ha Dibrugarh bad iaid paidbah sha Marwaripatty.
Na ka liang ki dkhot ki la pyrta pyrshah ia ka sorkar halor ka jingbym lah ban tehlakam ha kaba iadei bad ka jingkiewdor jong ki mar ki mata.
“Ka sorkar Assam ka la pulom ban tehlakam ha kaba iadei bad ka jingkiew dor ki mar ki mata ba kongsan ha kine ki sngi kiba mynta.Ka dor jong ka tyndong lyer shet LPG ka la kiew sha ka T.1200. Ki dor ki mur jong ki mar ki mata ba kongsan ki la kiew na ka por sha ka por. Ki riew paidbah ki la mad ia ka jingeh kaba khraw ban lah ban pyndap ia ki jingdonkam ha la ki jong ki iing ki sem, ” Ong u Aboni Kumar Gogoi uba dei u District secretary ka AASU.”
U la ong ruh, “U myntri uba khmih ia ka tnat Food and civil supplies u Rajit Dass bad u myntri rangbah (CM) ka jylla u Himanta Biswa Sarma ki la pulom ban tehlakam ha kaba iadei bad kane ka jingkiew dor ki mar ki mata. ”
“Ka sorkar ka dei ban shim mardor ia ki sienjam ban tehlakam ha kaba iadei bad kane ka jingkiew dor ki mar ki mata ba kongsan khnang ba ki riew paidbah kin lah ban kotbor ban thied ban pet. Ka dor jong ka petrol ka dei ban hiar. Ka sorkar ka la kut jingmut ban trei na ka bynta ka bha ka miat jong ki paidbah, hynrei kane ka jingkiew dor ka pyni ia ka jingpulom borbah jong ka sorkar, ” u la ong shuh shuh.
