Guwahati, Nohprah 16: Ka Sorkar Assam ka la pyllait paidbah iaka skhim hapoh ka Mukhyamantrir Mahila Udyamita Abhijan, kaba thmu ban ai jingkyrshan pisa sha ki 30 lak ngut ki kynthei ha kylleng ka jylla lyngba ki Self-Help Group (SHGs).
Ka prokram kadei ban pynkupbor ïa ki kynthei ha ka liang ka pisa kaba pynlah ïa ki ban kamai T.1 lak man la u snem, kaba kan ïarap lang T.3,000 klur shisnem bad T.30,000 klur ha ki phew snem ban wan sha ka ïoh ka kot jong ka Jylla.
Haba kren shaki lad pathai khubor ha ophis treikam ka ASRLM, u Myntri ka tnat Panchayat bad Rural Development u Ranjeet Kumar Dass u la ong ba ka Sorkar Jylla ka la dep ban ithuh haduh 30 lak ngut ki kynthei ha kylleng ka Jylla ki ban ioh jingmyntoi na kane ka skhim.
U Ranjeet u la ïathuh ba ka jingpynshisha ka dang iaid mynta ban pynthikna ia ka jingpyntreikam kaba paka bad kaba shai halor ka skhim Mukhyamantrir Mahila Udyamita Abhijan.
“La khmih lynti ba kawei pa kawei ka kynthei kan kamai T.1 lak shisnem, da kaba pyndonkam ïa ka jingkyrshan pisa bad jingpynroi ïa ka sap ba la ai hapoh ka skhim. Lyngba kane ka skhim ka ioh ka kot ka kiew T.3,000 klur ha ka shisnem bad T.30,000 klur ha ki shi snem, kaba kyntiew shibun ïa ka ïoh ka kot jong ka Assam bad kyntiew ïa ka jinglaitluid ha ka liang ka ioh ka kot jong ki kynthei” la ong u Ranjeet.
U la kam ba ka Sorkar Jylla hapoh ka jingïalam jong u Myntri Rangbah ka jylla u Himanta Biswa Sarma ka shim ïa ka sienjam kaba kongsan ban kyntiew ïa ka jingseng kam seng jam jong ki kynthei bad ban kyntiew ïa ki lad kamai jong ki kynthei ha ki jaka nongkyndong.
“Ngi pyrshang ban pynlong ïa ki kynthei ka Assam kum ki amtmanirbhar ban pynurlong ïa ka jingangnud jong u Myntri Rangbahduh ka ri u Narendra Modi. U Myntri Rangbah ka Jylla jong ngi u Himanta Biswa Sarma u la pyllait ia ka Mukhyamantrir Mahila Udyamita Abhijan ban pynurlong ia ka jingangnud jong u Myntri Rangbahduh ka Ri. Ngi ngeit ba khlem ka jingroi jong ki kynthei, ka Jylla kam lah ban kiew shaphrang. Lada ngi kwah ban pynlong ia ka jylla kawei na ki phra tylli ki jylla ba ha khlieh duh jong ka ri, ngi dei ban pynkup bor ia ki kynthei” u la bynrap.
U la ong ba ka Jylla ka don haduh 39.29 lak ngut ki dkhot jong ki 3.58 lak tylli ki SHG bad ka Sorkar kan iarap T.558 klur sha ki SHG hapoh ka Mukhyamantrir Mahila Udyamita Abhijan. “Ngi la ai jingiarap ruh T.445 klur sha kine ki SHG hapoh ka Kanaklata Mahila Sabalikaran Yojana” u la ong.
U Myntri u la ong ba la ithuh haduh 32,21290 ngut ki kynthei kiba ioh jingmyntoi ha ka Jylla hapoh ka Mukhyamantrir Mahila Udyamita Abhijan. Ka jingpynshisha ka long kaba ka Sorkar ka ai T.10,000 sha kawei pa kawei ka kynthei hapoh kane ka skhim.
U Ranjeet u la ong ruh ba ka Sorkar Jylla ka la kyrshan radbah ïa ki kynhun sengkam lajong jong ki kynthei da kaba pynlong ïa ka Asomi SARAS Mela, ka jingthmu ban kyntiew ïa ki mar jong ki ha ki ïew ki hat.
Kane ka mela kaba la pynlong hapoh ka jingpeit jong ka Assam State Rural Livelihood Mission (ASRLM) ka ai ïa ki nongshna kti bad ki nongseng kam nongkyndong ïa ka rynsan kaba kordor ban pyni bad die ïa ki jingtrei kti bad ki mar ba kyrpang jong ki.
U la ïathuh ba iaka Asomi SARAS Mela mynta u snem, kaba la pynlong naduh ka 30 tarik Naiwieng haduh 15 tarik Nohprah ka la don kumba 238 tylli ki stall kiba mihkhmat ia ki SHG bad ki nongseng kam nongkyndong na Assam bad kumjuh ruh 26 tylli kiwei pat ki jylla.
Ka ASOMI SARAS Mela ka dang bteng ban ïoh ïa ka jingkyrshan kaba khraw na ki nongwan jngohkai, da kaba ïoh ïa ka jingdie baroh kaba T.19.69 klur haduh ka sngi kaba khatduh.
Mynta u snem, ha kane ka jingïalang la don haduh 238 tylli ki stall, ba kynthup ïa 138 tylli na Assam, ha kaba la ïashim bynta na ki 27 tylli ki jylla ha kylleng ka ri. Ka jingdie baroh na ki stall jong ka Assam ha baroh ki bynta ki jingshna kti, ki jingshna kti, bad kiwei kiwei ka la kot sha ka T.11.07 klur.
Ka jingkheiñ jingdiah ka pyni ïa ka jingkiew kaba phylla haba ïanujor bad ka ASOMI SARAS Mela jong u snem ba la dep, kaba la ïoh ïa ka jingdie baroh kaba T.8.74 klur. Ka jingdie mynta u snem ka la kiew palat ar shah, kaba pyni ia ka jingkiew ka jingsngewtynnat bad jingjop jong kane ka jingthmu.
Napdeng ki stall kiba ïashim bynta, ka Purnima Mahila SHG na Lakhimpur district ka la paw kum ka die kaba bun tam, kaba la ïoh ban die haduh T.1.04 klur tyngka. Ha ka kyrdan ba-ar la ioh da ka Abhilash SHG na Sivasagar district bad ka jingdie ka long T.95 lak, katba ka Bishbhani JK SHG kaba dei ruh na Lakhimpur district ka la ioh ia ka kyrdan kaba lai ha kaba ka jingdie ka kot sha ka T.84.57 lak.
.){kind=link}