Guwahati, K’lyngkot 25 : Ka Sorkar Assam kala pynkhlain bha ia ki bor pahara ha ka thain Upper Assam namar ka jingma kaba lah ban mih na ki kam pyntriem jong ka ULFA-I, kaba la pynbna ban boycott ia ka jingrakhe.
U Superintendent of Police ka Dibrugarh Shwetank Misha ula kular ia ki paidbah da kaba ong “Ngi la pynkhreh bha ban pynthikna ba ka jingrakhe Republic Day kan iaid beit iaid ryntih, ban ailad ia ki paidbah ba kin iashimbynta khlem ka jing sheptieng”.
Ula ong ba ha kine ki shibnai bala lah, ki Pulit kila pynjur ia ka jingiaid pahara ha baroh ki jaka kiba kongsan bad kiba lah ban don ki ehrang kaikhlaw. Ula pyntip ba wat ka jingiaid pahara mynmiet ruh ka dei kaba la jur bha nalor ka jingtalasi ia ki kali kynthup naduh ki surok Highway, surok PWD bad kiwei kiwei.
Kat kum ka jingong jong u, ki kynhun pahara kila don mynta ha kylleng ki jaka ba kongsan jong ka District bad peit pyrman bha ruh ia ki jaka paidbah, ki jaka iew, ki pipe umphniang bad gas, ki power house, ki transmission tower, ki jingkieng ba jrong, ki lynti rel bad ka kad liengsuin.
U SP u pyntip ba ki Pulit kila buh ruh ia ki checkpoint ha kylleng ki jaka jonng ka sor bad ki jaka ba marjan ban lah tem ia ki jingma na ki kam pyntriem ka ULFA-I khamtam eh ha ki entry bad exit point.
Ka ULFA-I ka dei ka kynhun kaikhlaw kaba treikam ha Assam bad kala ieng ban dawa ia ka jinglaitluid na ka bynta ki paid Assamese.
