Guwahati, Rymphang 05 : Ka ‘Bharat Jodo Nyay Yatra’ sa shisien kala mih biang ha Iingdorbar Thaw Ain ka Assam da ka jingiakhih jong ka Congress bad boycott ruh ia ka jingkren lamphrang jong u Lat ka Jylla.
Kane ka jingpyrshah ia ka jingkren u Lat ka la jia hadien ba ki Nongialam ka Liang Pyrshah kim shym la ioh satia ia ka copy jong ka jingkren u Lat.
Ki MLA ka liang pyrshah kila pynlong ia ka jingiakhih shabar ka Iingdorbar halor kiba bun ki ishu bad kila rah ruh ia ki placard shuwa ba kan sdang ka Dorbar.
Kane ka jingiakhih kala pynbor ia u Lat ka Jylla ban pynkut ia ka jingkren tang hadien shi minit ba pynthut ka Liang Pyrshah.
Haba iakren bad ki lad pathai khubor, u Nongialam ka Liang Pyrshah Debabrata Saikia ula ong “ Mynta ka dei ka sngi jemdaw namar u Lat ka Jylla ula ai jingkren hynrei ngim shym la ioh copy satia ia ka jingkren. Ka Sorkar kala pheil ha baroh ki liang la ka dei ka jinglehhok halor ka suk ka sain, ka lehhok ia ki riewlum ka lehhok ia ka Assam Accord, lane leh hok ia ki briew ba shah ktah na ka jingshlei um bad kiwei kiwei. Kawei ka Khynnah kynthei kala shah jrong kti ha u Nongtrei ka BJP ha u snem bala lah hynei une u briew u khlem shah kem satia”.
“Kumjuh ruh ha ka SI Junmoni Rabha case, kala iap ha ka rukom ba ipher bha hynrei haduh mynta, ym shym la leh eiei ban kem ia uba donkti. Wat ha ka por jong ka ‘Bharat Jodo Nyay Yatra’ u President jong ngi ula shah thombor, ki kali jong ngi kila shah thombor bad ki poster bad banner jong ngi kila shah tar. Hadien ka Assam Accort, la thaw ia ka Committee bala khlieh da u (retd) Justice Biplab Sarma ban pyntreikam ia ka clause 6 hynrei ym shym la leh eiei haduh mynta” ong u Saikia.
Ula bynrap ruh ba ka Sorkar kala kular ban ai jingithuh kum ki ST ia ki hynriew tylli ki jaidbynriew riewlum hynrei haduh mynta kala shu sngap jar jar ia kane. “Ka Sorkar BJP kam shym la lah treikam ha baroh ki bynta” ula ong.
