Guwahati, Nailar 20 : Ha kawei ka jingjia ba pynkyndit ia baroh, uwei u briew ba 35 snem ula pyniap bad tep iala I Khun Kynthei ba dang 11 sngi ka rta hadien ba um shym la lah ban die ia i sha ki shijur ha ka dor ba T. 4 lak.
Ia kane ka jingjia la lap ha ka sngi Saitjain bad ia une u briew la tip kyrteng u Niranjan Malakar, u nongshongshnong ka Dubi Malipara kaba hap ha Bajali District.
Ha ka sngi Thohdieng, ki bahaiing jong une u briew kila pyntip sha ki Pulit ba ula jah rngai lem bad ine I Khunlung.
Ha ka sngi ka step kaba bud, une u briew ula phone iala u Kynum bad pyntip ba ine I Khunlung ila khlad noh bad ula phla ruh ia ka jaka ba ula tep ia i.
Kat kum ka jingiathuh ki Pulit, hadien ba ki bahaiing kila poi ha katei ka jaka tep, ki Pulit bad ki bor district kila khlong biang ia ka met n aka jaka tep kaba don hajan ka wah Bisannala.
Ki Pulit kila shimti ia ka metiap bad kila phah sha hospital ban leh ia ka post mortem. La pyntip ba ki Pulit kila thwet jur ia une u Kpa uba la phetrieh mynta.
Kat kum ka jingiathuh ki bahaiing, u Niranjan ha ryngkat uwei u doktor Diganta Choudhury, kila suhbuit ban die ia ine I Khunlung naduh ka sngi ba kha ha Hospital hynrei kim shym la lah satia, haba khatduh la hap ban ialam noh ia ine I Khunlung shala iing.
Ha kajuh ka por, ki Pulit kila pyrshang ruh ban wad ia une u doktor bad ia u Niranjan.
