Guwahati, Risaw 02 : Hadien ka jingpynkiew dor iaka bai bording elektrik da ka Assam Power Distribution Company Ltd (APDCL), ka Assam Pradesh Congress Committee (APCC) kala pynbna ia ki jingiakhih bapher bapher hapoh ka Jylla naduh ka 3 tarik Risaw haduh ka 5 tarik.
Ka APDCL kala pynkiew ia ka bai bording ha man ka shi unit naduh u bnai Risaw 2023 hadien ka jingpyrkhat thymmai ia ka dor jong ka Fuel and Power Purchase Price Adjustment (FPPPA)
Ka jingpynkiew dor dang shen ia ka bording, kala pynktha khlieh ia ki paidbah ka Jylla. Namar ka jingpyntreikam ia ka smart meter, ki paidbah kila mad ia ki jingeh ba khraw bha.
Nalor kane, hadien ka jingpytreikam ia ka smart meter, kiba bun ki nongpyndonkam bording kila shah ot bording khlem da ioh pdiang satia ia ki notice.
U Bhpen Kumar Bora, President ka APCC ula ong “Shibun ki jingiakhih pyrshah ia ka jingpynkiew bai bording kan sdang naduh ka 3 tarik Risaw ha manla ki Block, ha ka 4 tarik pat ha ki Panchayat level, bad ka 5 tarik pat ha manla ki District Headquarter”.
“Ia kane ka notice ba pynkiew dor ngin sa iathang paidbah kum ka dak ka jingpyrshah. Ngi kular khmat ki paidbah ka Jylla ba ha ka sngi ba ka Congress ka wan biang ha ka bor ka Assam, baroh ki longiing kin ioh ei ia ka bording ba 200 unit” ong u Bora.
Ka dor jong ka FPPPA kala kiew haduh 30 paisa shi unit haduh ka 300 unit na ka bynta ki Longiing, 50 paisa shi unit ia kiba pyndonkam bording hapdeng 301 haduh 500 unit, T. 1.29 shi unit ia kiba pyndonkam bording palat ia ka 500 unt. Ka dor FPPPA ia kiwei pat kynthup ki dukan, ki karkhana bad kiwei kiwei kan long T. 1.29 shi unit.
