Assam | Pakhang surok ka AMSU ha Tinsukia ba pynslem ka Sorkar ban ithuh Scheduled Tribe

Tinsukia, Nailur 15: Ka All Moran Students’ Union (AMSU) kala sdang ia ka jingpakhang surok ba khlem pud por ha ka thaiñ eastern jong ka jylla Assam ha Tinsukia naduh mynta ka sngi Nyngkong ban pyrshah ïa ka jingpynslem ban ai ïa ka kyrdan Scheduled Tribe (ST) ïa ka jaidbynriew.

U Myntri Rangbah duh ka ri u Narendra Modi, ha ka rally kaba la long ha Assam ha u snem 2014, u la kular ia ki 6 tylli ki jaidbynriew na ka bynta ban ai ia ka kyrdan ST hynrei ha ka jingleit jngoh jong u kaba ar sngi dang shen, um shym la kren eiei halor katei ka kam.

Nalor ka kyrdan ST, ki nongiakhih ki la dawa ruh ia ka jinglong mar ryngkat ha ka riti synshar (constitutional parity). Ka Moran Autonomous Council ia kaba la thaw ha u snem 2020 katkum ka ain jong ka jylla, bad mynta ka don ka jingduna bha ka bor haba ianujor bad ki lai tylli kiwei pat ki council ha ka jylla kiba treikam hapoh ka Sixth Schedule.

Haba kren bad ki lad pathai khubor, u Jaikanta Moran uba dei u general secretary ka AMSU u la ong, “Naduh ka por ba ka Assam Gana Parishad (AGP) ka don ha ka bor hapoh ka jylla Assam.Ngi la dawa ban pynioh kyrdan ST hynrei kila shet kylla ia ngi.Ka sorkar jong ka Congress ruh kumjuh kala shet kylla ia ngi.Hynrei ha u snem 2014 ngi iohi ia ka jingkyrmen na ka sorkar BJP hadien ba u Myntri Rangbah u Narendra Modi u la kular ban pynioh kyrdan ST sha ka jaitbynriew jong ngi, hynrei kine ruh kumjuh kila shet kylla ia ngi.Ka jingdawa ST kadei ka jingdawa kaba la sahteng lah slem bha bad ngi la pynlong ka jingiakhih kham mynshwa ban pynbor ia ka sorkar ha kaba iadei bad kane ka jingdawa hynrei kam shym la jia kaei kaei ruh”

“U Prime Minister u Narendra Modi u khlem kren wat tang shi kyntien ha ka jingwan ban iuh kjat jong u ha Assam.Ngi dang khmih lynti ba u Modi un kren eiei ha kaba iadei bad ka kyrdan ST jong ngi ha ka jingkren jong u ha Assam, hynrei wat tang shi kyntien ruh u khlem kren,” ong u Moran.

“Ka jaitbynriew Moran kadei kawei jaitbynriew trai ri trai muluk jong ka Assam kaba la dawa ïa ka kyrdan ST la slem bah. Ha u snem 2014, u PM Narendra Modi ha ka jingïalang elekshon u la kular ban ai kyrdan ST ïa ki hynriew jaitbynriew jong ka Assam. Ngi pyndep ïa baroh ki kyndon jong ka ST hynrei ka sorkar kam shym la lah ban pyndep ïa ka kyrdan ST jong ngi,” ong u wei u dkhot ka AMSU.

U la ong,”Naduh mynta ka sngi, ngi la pynlong ia ka jingkhang khyrdep ia ka ioh ka kot ban pynbor ia ka jingdawa jong ngi kaba la slem bha.Ngin bteng ia ka jingiakhih jong ngi tad haduh ba ka jingdawa jong ngi kan urlong,”.

Ka jingsngewsih bad ka jingbitar ki paidbah ka mih na ki jingkular bym shym la pyndep ne ymlah ban pynurlong ha ka por ba ïalap elekshon jong ka BJP ha u snem 2014, ha kaba u Modi u la kular ban ai kyrdan ST ïa ki hynriew tylli ki jaitbynriew Assam.

Hadien shisnem, kine ki kynhun — ba kynthup ia ki Moran, ki Tai Ahom, ki Mottock, ki Koch Rajbongshi, ki Sootea, bad ki Jaitbynriew Tea — ki dang sah ha ka kyrdan ba la niew ba ki dang dei kum ki Other Backward Classes (OBCs).
“Ngin khanglad ia ki trok kit umphniang bad dewiong ban iaid na surok. Ka jingiakhih jong ngi kan dang jur lada ym lah ban pynurlong ia ka jingdawa jong ngi. Ka kyrdan ST ka dei ka hok jong ngi ba la kha hynrei ka sorkar pdeng kam shym la leh ei ei ban pynbiang ia ngi ia kum ki ST. Balei ka sorkar BJP ka la lehkai ia ka jingkular lamler ia ka jaitbynriew jong ngi ban ioh ia ka kyrdan ST,” la ong uwei pat u dkhot jong ka Amsu.

Ka jaitbynriew Moran ha ryngkat bad ki san tylli ki jaitbynriew ba kynthup ia ka jaitbynriew Tai Ahoms, Mottocks, Koch Rajbongshis, Sooteas bad ki jaidbynriew ba rep slasla, kila ap khmih lynti ba ka BJP kan pynurlong ia ka jingkular kaba la ai ha u snem 2014 ha shwa ka election Lok Sabha bad ha ki election ba hadien ruh kumjuh.

Ka jingkular ban pynioh kyrdan ST sha kine ki jaitbynriew ka la ioh ia ka jingkyrshan kaba pura ia ka BJP ha kata ka por.

Hynrei, ka jingpynslem ka la lam pat sha ka jingbitar bad ka jingsngewsih kaba nang jur hapdeng ki hynriew tylli ki jaitbynriew, kiba mynta ki shah kheiñ kum kiwei pat ki jaitbynriew kum ki Other Backward Classes (OBC).