Tinsukia, Iaiong 15: Ka All Adivasi Students’ Association ka Assam (AASAA) hynnin ka sngi Thohdieng ka la pynlong ia ka pakhang surok kaba shikynta hapdeng ka surok Duliajan-Tinsukia road halor ka jingjia shah leh beijot bad shah pyniap jong kawei ka khynnah rit kaba la jia ha ka 20 tarik u bnai Lber ba la dep.
Ki nongiakhih pyrshah ki la khang ia ka surok ha Bahadur Chariali hapoh Tinsukia, kaba la wanrah ka jingthut ha ka leit ka wan jong ki kali.Ka kmie jong katei ka khynnah rit ka la pynkut noh iala ka jong ka jingim hynnin ka sngi Thohdieng ha la ka jong ka iingsah.
Ki nongiakhih pyrshah ki la thang da ki taiar bad dawa ban pynioh ka jingbishar hok na ka bynta katei ka khynnah rit bad ka kmie jong ka, kaba la pynkut noh iala ka jong ka jingim namar ka jingsngew lehrain bad ka jingshah ktah kaba jur lyngba katei ka jingjia.
Katkum ki khubor la ong ba ha ka 20 tarik u Lber ba la dep, katei ka khynnah 13 snem rta la kynnoh ba ka la shah leh beijot ha uwei u rangbah 53 snem rta hapoh ka thain kaba don ia ki jaka rep slasha kaba hap hapoh Bordoubi police station, ha Tinsukia district. Utei u briew uba la shah kynnoh donkti ula jah rngai naduh ka 29 tarik u Lber ba la dep.
Utei u briew uba la shah kynnoh donkti ia uba la tip kyrteng kum u Shiva Prasad Sharma bad ia uba la tip bha kum u Somendra na ka shnong kaba bun ki Nepali hapoh Goipani la ong ba u la khroh ia katei ka khynnah da u shoklet bad ialam ia ka shapoh ka kper slasha kaba don marjan ka surok Doomdooma bypass ha ka por kumba 3 baje janmiet bad leh ia katei ka kam pyntriem.
Ia katei ka khynnah kaba dei na ki nongshong shnong hapdeng ki nongrep slasha kham hadien la lap da ki trai shnog hapdeng ka jingshitom kaba jur ha kaba la pynkit noh shapoh Tinsukia civil hospital da ki dkhot ka longiing jong ka hadien ba la pynthikna ba ka la shah leh beijot.
Ha ka 21 tarik u Lber ba la dep la ujor da ka FIR hapoh Bordoubi police station bad la rejistar ia ka case hapoh ki kyndon jong ka POCSO act bad kiwei pat ki kyndon.Utei u briew uba la shah kynnoh donkti ula jah rngai noh naduh katei ka por.Hynrei, ha ka 14 tarik mynta u bnai ha ka por kumba 11 baje mynstep ka kmie jong katei ka lanot ka la pynkut noh iala ka jongka jigim, ong u dkhot ka seng AASAA.
Ula ong ruh ba na ka liang ki pulit ki la pulom ban ioh kem ia u briew uba la shah kynnoh donkti.Kumta ruh namar ka jingshim stng jong ki pulit ka Tinsukia, utei u briew ba la shah kynnoh donkti ula ioh ban iaid laitluid.Kumta ngi dawa jur ba dei ban kem mardor ia utei u runar.Na ka liang ki nongiakhih pyrshah ki la aiti ruh ia ka memorandum sha u ADC Kangkan Jyoti Saikia hadien ba ki la pynkut noh ia katei ka pakhang surok.
