Guwahati, K’Lyngkot 29: U Myntri Rangbah ka jylla Assam Himanta Biswa Sarma u la kren ia ki jingkren kiba thew pyrshah beit ia ki “Miya” Muslims, da kaba pynshlur ia ki nong Assam ba kin “pynjynjar” ïa ki Miya, khnang ba kin mih noh na ka Jylla namar ka jingeh ba ki mad.
Haba kren sha ki nongthoh khubor, u Sarma u la ong, “Pynthut beit ia ki Miya Muslim da kino kino ka lad ki lynti ba kin mad jingeh. Lada ki iakynduh jingeh na ka jingshah pynthut, kin hap ban mih hi na Assam. Lada nga kwah ban ai jingeh ia ka Miya, nga lah ban leh ha ka por 12 baje mynstep. Kam don jingeh eiei ruh em ka. Ngin pyrshah beit ia ki Miya Muslim. Ngin ym buhrieh ei ei—ngi kren shai ba ngi long pyrshah ia ki Miya.”
Shuh shuh u myntri rangbah u la kam ba ki dkhot jong ka imlang sahlang ki la poi sha Duliajan bad u la pynpaw shai kdar shaphang ki jingktah kiba lah ban mih jngkam sha shilliang pud. “Ka Tsunami kan jia hangne, hynrei ka jingmih kan long ha Pakistan”, u la ong.
Khlem da jer kyrteng ïa u nongïalam ka Congress, u Gaurav Gogoi, u Sarma u la buh jingkylli ïa ka jingtip jong u bad ki konstitwensi jong ka Assam. “Lada phi kylli ia nga ia ki kyrteng ki constituency nga lah ban ong khlem da peit. Hynrei hato u lah ban jer kyrteng ia ki khlem da peit ia ki kot ki sla?” la dak jingkylli u Sarma.
U la bteng shuh shuh da kaba ong ba ka Congress ka la kylla long ka “Miya party” bad kynnoh ba ki jingmih na ka elekshon ha ki katto katne ki thain ki shah ktah ha ka niam bad ka jaitbynriew. “Ha Lower Assam, ka lah ban don ka jingkut namar ba ka niam bad ki jaitbynriew jong u, ki don hangtei. Ha ka elekshon Miya, un jop”, la kynnoh u Sarma.
Haba phai bad ka Special Revision (SR) kaba dang ïaid shakhmat ïa ki thup kyrteng thep vote ha Assam, u Sarma u la ong ba u la bthah ïa ki nongtrei ka BJP ban thep bun tylli ki application Form 7 pyrshah ïa ki “Miyas.” U la ong ba ia kine ki jingbthah la ai lyngba ka video conferencing, da kaba kyntu ia ki nongtrei ka party ba kin aiti ia ki jingujor ha ka por ba dang pynbeit thymmai.
Ka Special Revision ia ki thup kyrteng nongthep vote ka dang iaid mynta ha Assam. Shwa ia kane, ka Congress ka la kynnoh ba ia ki jingpyrshah Form 7 la ai da kaba bun khlem ki daw ne ki jingtip ba bniah, bad ka la pan jingiarap na u Chief Electoral Officer.
Ka Form 7 la pyndonkam ban pynpaw jingpyrshah ia ka jingpynrung ia ka kyrteng ha ka thup nongthep vote lane ban wad ban pyndam noh ia la ka jong ka kyrteng ne ia ka kyrteng jong uwei pat u briew.
“Ka dei ka jingshisha kaba la tip ba ki don ki Miya Bangladesh ha Assam, hato don mano mano ba ioh notice ha Thowra ne ha Dimou? Ym don ba ioh, lada ki Miya Bangladesh kim ioh notice ha ka por SR, te kaba mut ba ym don bar jylla ha Assam”, la ong u Sarma haba kren sha ki lad pathai khubor.
Katba ka elekshon sha ka Assam Assembly election ka la jan, ka “saiñ pyrthei Miya” ka la mih kum ka mat saiñ hima sima kaba kongsan ha ka jylla, kaba la nang pynwan dur shuh shuh ïa ka jingïathuh khana saiñ hima sima jong ka BJP.
