Guwahati, K’Lyngkot 5: Ar ngut ki briew kila mynsaw na ka jingkhynnih u jumai uba 5.1 magnitude ha central Assam ha ka step kynjat shai ka sngi Nyngkong.
Kine kiba la mynsaw la ithuh kum ka Joymoti Dewri (80) bad u Manoj Kumar. Baroh arngut ki dei ki nongshong shnong jong ka shnong Dalbori kaba hap ha Mikirbheta circle kaba don ha Morigaon district jong ka Assam.
Ka Dewri ka la mynsaw na ka bynta jong ka khlieh katba ka dang mareh shabar na la iing bad u Manoj u la mynsaw malu mala.
Kat kum ki khubor, la iathuh ba ka jingjulor kaba rit ka la jia ruh ha ki katto katne ki iing ha Morigaon district na une u jumai u la khynniuh ha ka por 4.17 baje mynstep.
Ka jingkhih u jumai ka la pynbor ia ki briew ban phet krad na ki iing ki sem jong ki sha ki jaka ba long thylli ne madan.
Ki heh ophisar, ki iathuh ba ia katei ka jingkhih jumai, lah ban iohsngew ha ka central-western Arunachal Pradesh, Meghalaya, bad ha ki bynta jong ka Nagaland, Manipur, Mizoram, Tripura bad northern West Bengal.
Ka thain shatei lam mihngi ka don ha ka jaka ba jur bha ka jingkhynñiuh jumai, namar kata ki jingkhynñiuh jumai ki ju jia man ka por hangne.
