Guwahati, Naiwieng 27: Ka iing dorbar thaw ain jong ka Assam ha ka sngi palei kala mynjur ne pass ia ka Assam Prohibition of Polygamy Bill, 2025 lane ka ain ban khang shong tnga bun ngut, tang hadien ar sngi ba la wanrah ha ka iing dorbar jong ki 126 ngut ki dkhot.
U Myntri Rangbah ka jylla Assam u Himanta Biswa Sarma u la ong, ba kane ka ain ka dei ka sienjam kaba kongsan ban pyntreikam ia ka Uniform Civil Code (UCC) ha ka jylla. U la pynpaw ruh ba lada shah jied biang ha ka elekshon sha ka iing dorbar thawain jong u snem ban wan, ka sorkar jong u kan wanrah ia ka UCC Bill ha ka sngi shong dorbar kaba nyngkong eh bad kan pynthikna ia ka jingpyntreikam ia ka.
“Ngi ngin buh kyrpang (reserve) ia kane ka Bill na ka bynta ban ioh ka jingmynjur na ka President Droupadi Murmu.Ngam tharai ba kane ka Bill kan shah kyntait ban mynjur, namar ba ka President ka dei ka kynthei”, la ong u Sarma haba kam ba kane ka ain ka thmu ban iada ia ki kynthei bad ban ai ia ka hok ia kiba kylla long ki lanot na ka jingshongkha bun tnga.
Ka Bill ka buh ia ka jingtyrwa ban set phatok haduh 10 snem bad ka kuna kaba heh bha ia kito kiba pynkut noh ia ka jingshongkha kaba la don lypa shwa ban rung ha kawei pat. Kiba leh biang ia kum kane ka kam runar kin mad ia ka jingpynshitom kaba ar shah kumba la buh.
Kane ka aiñ kan nym treikam ha ki jaka ba hap ha ka (Sixth Schedule) ne ka Khyrnit ba Phra jong ka Assam — kum ka Bodoland Territorial Region, ka Karbi Anglong, bad ka North Cachar Hills. Ki Scheduled Tribe kiba la ithuh katkum ka Article 342 ruh la pyllait na ka jingpeit jong ka.
Da kaba khot ïa kane ka jingkhang ïa ka shongkha bun ngut tnga kum “ka sienjam sha ka UCC” ne “step towards the UCC”, u Sarma u la pynskhem ïa ka jingkut jingmut jong ka sorkar jong u ban wanrah ïa ka jingïapyn iahap ha ki aiñ ha kylleng ki jaitbynriew.
