Guwahati, Rymphang 12: U Advocate General ka Gauhati High Court Devajit Saikia ha ka sngi Palei u la kren sha ki lad pathai khubor ha Guwahati ha kaba ia dei bad ka Mukotduma bai mynrain khmat ba la ujor da u Myntri Rangbah ka Assam Himanta Biswa Sarma pyrshah ia ki nongialam ka seng Congress Gaurav Gogoi, u Jitendra Singh bad u Bhupesh Baghel bad ka Debabrata Saikia.
U Saikia, u ong ba katei ka mukotduma ka don jingiadei bad ka jingkren sha ki lad pathai khubor, kaba la pynlong da ki nongialam ka Congress, ha ka 4 tarik u Rymphang, 2026, ha kaba la kynnoh ba ki la “kila kynnoh palat liam” pyrshah ia u Myntri Rangbah ka Jylla bad ka iing ka sem jongu. Kat kum ka jingong u Saikia, ki nongïalam ka Congress ki la kynnoh ba u CM bad ka ïing ka sem jong u ki shim jaka kumba 1,200 bigha ne ki jaka ha kylleng ka Assam, da kaba kynnoh ba ki bat ïa ki jaka, ki buh ïa ka “HBS tax,” bad ki donkti ha ki kam thok.
U la bynrap ruh ba ïa kitei ki jingkynnoh la pynmih ha ki kot khubor Assam ha ka 5 tarik u Rymphang, hadien kane u Myntri Rangbah ka jylla u la leit sha ka ïingbishar da kaba pynpaw ba ka nam jong u ka la shah pynthohbria.
U Saikia u la pyntip ba u Himanta Biswa Sarma u la mudui ïa ka mukotduma bai mynrain khmat ha ka ïingbishar jong u Civil Judge (Senior Division) No. 1, Kamrup (Metro), ba la register kum ka Title Suit No.ha ryngkat bad ki jingthoh na ka bynta ban khang lad ban dang pynmih shuh shuh ia ki jingkynnoh.
Ula ong ruh ba u Myntri Rangbah ka Assam u la aiti ha khmat ka iingbishar ia baroh ki kot ki sla halor ka jingdon jingem kiba dei jong u bad ka iing ka sem jong u, kiba ula pynbna ha ka election affidavits, income tax returns, bad ka statutory records, bad ba ym don kano kano ka mar kaba leh benami ha ka kyrteng jong ki.
Hadien ka jingbishar, u Saikia u la pynpaw ba ka ïingbishar ka la lap ïa ka mukotduma kaba nyngkong eh bad ka la ïohi ba ka jingiai bteng ban pynmih ïa kum kine ki jingkynnoh ka lah ban wanrah ïa ka jingsniew kaba ym lah ban pynbha pat ïa ka nam jong u Myntri Rangbah ka Jylla.
Kat kum ka jingong u Advocate General, ka ïingbishar ka la pynmih ïa ka hukum kaba khanglad ïa ki nongïalam ka Congress u Gaurav Gogoi, u Jitendra Singh, u Bhupesh Baghel bad ka Debabrata Saikia ban kynnoh ïa kum kitei ki jingkynnoh, bad la bthah ruh ïa ki trai jong ki kotkhubor ba kin kiar na kaba pynmih ïa kum kine ki khubor tad hadien ba ka jingbishar kan khot bishar biang ia kaba la pynbeit ban long ha ka 9 tarik u bnai Lber 2026.
