Guwahati, Lber 25: Da ki spah ngut ki samla na ka Jatiya Yuva Sakti, kaba dei youth wing jong ka Assam Jatiya Parishad (AJP), ki la pynlong ïa ka jingïakhih kaba jur bha shabar ka ophis treikam jong ka Assam Cooperative Apex Bank ha Panbazar, bad dawa ban tohkit da ki heh sorkar halor ka jingkynnoh bamsap ki heh jong ka bank.
Ia kane ka jingiakhih la ïalam da ki nongïalam ka AJP, u Chandrapal Baruah, u Iftikar Hussain, u Ankur Gogoi, u Durlav Talukdar bad ka Ananya Saikia, ki nongïakhih ki la kynnoh ïa u chairman jong ka bank, u Biswajit Phukan (MLA), bad u managing director, u Dombaru Saikia, kiba la leh ia kane ka kam ban ioh nong shimet. Ki nongiakhih ki la pyrta pyrshah ia ka jingkynnoh bamsap bad ki la kynthoh ia ka sorkar jylla ba kam shym la shim khia watla ki sakhi ki la don.
Shuh shuh la kynnoh ba naduh u bnai Jylliew 2024, ka bank ka la treikam khlem da don ka jingiateh (contract) bad uno uno u IT Vendor, kaba la pynmih ia ka jingeh kaba khraw ha ka liang ka jingshngain bad ka jingtreikam.
La kynnoh ruh ba ka jinglut ha ki jingtei jong ki bank ka la kiew na ka ₹28 klur ha u snem 2018 sha ka ₹50 klur ha u snem 2025, ha kaba ₹14 klur la kynnoh ba la pynpoi sha ka KPMG. La iathuh ba la ai ia ka jingujor sha ka Central Vigilance Commission ha ka 30tarik kyllalyngkot, hynrei na ka liang ka sorkar Jylla, ka sngap mynthi khlem da jubab.
Ha ka 3 tarik u Lber, ka sorkar Assam kala bthah ia u Registrar of Cooperative Societies ban tohkit ïa ki jingkynnoh bad ban aiti ïa ka kaiphod hapoh 15 sngi. Hynrei ki nongiakhih ki la kyntait ia kane namar ka jingbymleh ryntih, da kaba kynnoh ba ka sorkar ka iada ia kiba donkti.
“Ka pisa jong ki hajar ngut ki nongbat account ka don ha ka jingma, hynrei ka sorkar ka dang sngap mynthi.Ngi dawa ia ka jingtohkit kaba laitluid bad ban pynshitom da kaba tyngeh ia kito kiba pyndonkam bakla ia ka pisa paidbah”, la ong u Chandrapal Baruah.
Ka Assam Cooperative Apex Bank Ltd. ka dei ka jaka ai pisa kaba kongsan bha, bad katei ka jingkynnoh kaba dang jia ka la pynmih ïa ka jingsngewkhia jong ki paidbah, hynrei da ka jingsnoh kti lang ki seng bhalang ban pyrshah kane ka jingpynbor ia ka sorkar kala nang khlain ban leh da kaba tyngeh.
Ki nongiakhih ki maham ruh ba kane ka dei tang ka jingsdang jong ka jingiakhih kaba kham heh kaba dawa ia ka jinglong khuid ha ka liang ka pisa tyngka bad ka hok lada ym shim khia stet.
