Guwahati, Nailur 8: Ha shwa ka Assembly election ka ban long ha u snem 2026 ha ka jylla Assam, lai ngut ki nongialam ba pawkhmat bha ka BJP bad AGP, kila pyniasoh sha ka Congress ha ka sngi Nyngkong bad kane ka la ktah bha ia ka sorkar BJP bad AGP.
Kitei ki lai ngut ki kynthup ia u general secretary barim ka Asom Gana Parishad (AGP) uba dei ruh u MLA barim ka Kamalpur u Satyabrata Kalita, u MLA barim ka BJP ka Sipajhar u Binanda Saikia, bad u MLA barim ka BJP ka Baithalangso u Dr. Mansing Rongpi.Kila shah pynrung pura sha ka Congress ha ka ophis treikam jong ka Congress ha New Delhi.
Haba pdiang sngewbha ïa ki nongïalam sha ka party Congress, u president ka Assam Pradesh Congress Committee (APCC) uba dei ruh u MP u Gaurav Gogoi u la ong ïa kane kum “ka jingkylla kaba khraw na ka bynta ka Assam Congress.”
U la kynthoh,“Kane ka dei ka sngi ba khraw namar ki nongïalam kiba la ïasoh bad ngi mynta ka sngi ki mih khmat shisha ïa ki jingeh jong ki paidbah.Ka sorkar jong u Himanta kam dei satia ka sorkar jong ki paidbah bad kam shym la trei na ka bynta ki nongrep, ki khun samla, ki longkmie lane wat jong ki nongkhaii.Ka trei tang ban ioh myntoi shimet jong u myntri rangbah bad kiba ha iing jong u.Wat ki nongtrei ka BJP bad AGP mynta kila sngewthuh bad pei shkor ba ka jingiatrei lang ka jong ki kala pykylla long ka kompeni shimet jong u Himanta Biswa.”
Shuh shuh u Gogoi u la pynpaw ba katba u Binanda Saikia bad u Dr Mansing Rongpi ki dang wan phai biang sha ka iing ka sem jong ka Congress bad ka jingmih noh jong u Kalita noh na ka AGP kala pyni ia ka jingtlod ki seng riewlum hapoh ka jingsynshar ka BJP. U la ai ksai ruh ba kane kadei tang ka jingsdang, bad bynrap ruh, “Mynta ka sngi ka jingpynrung dkhot pura sha ka Congress kadei tang dak bad la khmih lynti ba na ka liang synshar kin don shibun ha shwa ka election 2026.”
Ha kane ka sngi ba pynrung dkhot pura la wan ban ia don lang da ki nongialam ba ha khmat eh jong ka Congress ba kynthup naduh u AICC General Secretary (organisation) u K.C. Venugopal, u Jitendra Singh ba peit ia ka Asam, ki MP ba kynthup ia u Pradyut Bordoloi bad u Rakibul Hussain, bad ka President jong ka Assam Mahila Congress ka Mira Borthakur.
